KRALENDIJK, Bonaire
Komishon di Dia di Boneiru kende ta enkargá ku organisá e festival “Un kanto pa Boneiru”, despues ku e inskripshon a sera a disidí na kanselá e festival aki.
Apesar di e situashon di Covid-19 a purba tòg den e korto tempu pa wak si por organisá e festival via e sistema di live streaming, pero debí ku e inskripshonnan tabata poko a yega ne desishon pa para e festival.
Pa otro aña ku Dios su poder e komishon di Dia di Boneiru ta spera ku e festival aki pero tambe e selebrashon di dia di Boneiru lo por sigui na e manera ku ta duna mas realse na esakinan sin tin mester adaptashon pa motibu di e pandemia di Covid-19. Ta hasi un yamada na tur esnan ku kier partisipá na e festival otro aña pa kuminsá traha for di awor riba e komposishon i areglo. Komishon di Dia di Boneiru lo anunsiá atraves di medionan di komunikashon i Facebook di Gobièrnu na momentu ku inskripshon lo habri pa e festival “Un kanto pa Boneiru 2021”. Esaki ta pa nos muchanan tambe ku kier partisipá.