Resientemente a tuma lugá e kompetensia di Arte di Palabra ABC 2022 na Kòrsou den sala di K-Center na Brievengat. Boneiru a logra nuebe premio.
Tabatin 44 obra presentá pa diferente hóben di Aruba, Boneiru i Kòrsou. Boneiru a partisipá ku diestres obra presentá dor di diesun partisipante i Boneiru tabatin representashon den kuater di e seis kategorianan.
E partisipantenan tabata Nathaniel Paulo, Ramso Coffie, Juriëlla Leoneta, Jeaniro Dorothea, Maria-Luisa Troncon, Irlenska Martinus, Emily Frans, Yeminah Maria, Alicia Anthony, Q-Zeally Piar i D’angé Sint Jago. Partisipantenan tabata bou di guia literario di Jonathan de Wind. E delegashon di Bonaire enkabesá pa Sekshon di Kultura, Arte i Literatura (SKAL) tabata konsistí di Sulainie Martis, Seferina Saragoza, Lyndon Leito, Juliette Clarenda, Christopher Frans, Urvin Sint Jago i Jeremy Pikerie.
Remarkabel ta ku Boneiru a posishoná su mes hopi bon den e kategorianan ku el a partisipá. Den tur kategoria ku Boneiru a partisipá un of mas obra a sali den e tòp tres!
Den dos kategoria Boneiru a sobresalí; e kategoria di kuenta eksistente klas 1-2 i e kategoria di poesia original klas 3-6. Kategoria kuenta eksistente klas 1-2 D’angé Sint Jago a konkistá e premio másksimo kual ta promé lugá . E otro kategoria, esta poesia original klas 3-6, tabata unu bastante fuerte ku partisipashon di diesshete obra. Den e kategoria aki Bonaire a konkistá e promé 3 posishon, esta di ganadó ku obra di Juriëlla Leoneta, promé i segundo finalista.
Delegashon di Arte di Palabra di Boneiru ta gradisí tur pa e sosten risibí di primeramente mayor i famia di e partisipantenan, fanátikonan i tur ku a biba ku e aktividat aki desde komienso te final. Tambe ta gradisí e komishon organisadó di Kòrsou bou di guia di Elvira Bonafacio i Ange Marie Jessurun (tante Ange) pa a inisiá ku e proyekto aki na aña 2000. Nos partisipantenan di Boneiru a representá Boneiru dignamente na Kòrsou.