Awe nochi amantenan di naturalesa lo cana bao Full Moon den parke Arikok

Awe ta ‘Full Moon’ crioyo bisa Luna yen. Parke Arikok pa e dia special aki ta haci actividad special tambe pa e comunidad di Aruba. Pa varios biaha caba parke Arikok ta organisa e Full Moon y awe e lo ta e ultimo pa e aña 2020. Nos tur sa cu aña 2020 no a bay bon pa hopi di nos, pero e gana di haci algo positivo cu a crece grandemente bao di nos propio hendenan ta actividadnan local.
Den menos cu 6 ora na momento cu e anuncia e ultimo Full Moon pa 2020 ya caba tur e cuponan a yena. Un total di 40 persona lo forma parti di un anochi cu luna yen hunto cu e parkrangers cu ta guia e grupo di personanan cu lo bay cana den mondi awe nochi.
Loke cu tambe ta remarcabel ta cu tin personanan a participa un biaha caba, pero nan ta sigui ripiti na e evento di Full Moon, segun Carl Quant relacionista publico di parke Arikok, nan ta keda encanta cu e naturalesa cu nan ta experencia durante e anochi y cada biaha e ta diferente.
Esaki ta un experiencia pa conoce naturalesa den scur, pero sinembargo e luna ta duna bo asina hopi iluminacion cu no tin mester di flashlight pa por cana. E grupo lo sali awe 6:30 PM y lo haci diferente bishita den diferente parti di nos naturalesa manera, Cunucu Arikok,Sero Bonchi,Rooi Cacho y Sero Arikok. Pa prome biaha lo subi e di dos sero di mas halto di Aruba cu ta e sero Arikok.
Segun Carl Quant na momento cu e personanan yega na e top di e sero di Arikok por disfruta e bunitesa di Aruba durante di anochi , pero tambe e bunitesa di e naturalesa ilumina door di e luna. E grupo di 40 persona lo bay experencia Aruba den un forma hopi bunita.