Desde juni di aña 2021 fundacion Go Cultura a cuminsa presenta un serie di video riba nan paginanan di media social, cu ta pone enfoke riba palabranan menos uza den nos idioma Papiamento.
Artista y creativo local Jair Vesprey ta e presentador di e serie aki cu a wordo yama “Bedei nos Papiamento”.
E iniciativa aki a wordo tuma, mirando cu e ta necesario pa sigui promove e bon uzo di nos idioma, pero tambe considerando e importancia di promove nos idioma bao di nos hobennan, cu por identifica cu un artista gusta y un personahe hoben, creativo y talentoso manera Jair Vesprey. Go Cultura a aserca musico Chris Kross pa crea e musica special pa “Bedei nos Papiamento”.
E inspiracion pa produci e videonan special aki ta nace despues di mira asina hopi esfuerso door di varios persona di nos comunidad pa cu e uzo corecto di nos Papiamento.
Durante e desaroyo y promocion pa uzo corecto di nos idioma, varios ta e personanan den nos comunidad cu pa varios decada a haci hopi esfuerzo pa cu esaki. Manera entre otro Sr. Hubert “Lio” Booi, Sr. Ramon “Todd” Dandaré, Sra. Joyce Pereira, Sr. Ernesto Rosenstand, Sr. Mario Dijkhof, Sr. Jossy Mansur y mucho mas.
Desde e luna aki, por cuminsa presencia e videonan aki riba Nos Isla TV canal 23 tambe for di dialuna pa diabierna na orarionan specifico tur dia, pues 9’or di mainta, 1’or di merdia y 7’or di anochi. Tur dia lo enfoca riba un palabra diferente.
Pa loke ta “Bedei nos Papiamento” riba e plataforma digital, temporada number dos ta den pleno preparacion. E biaha aki lo no pone enfoke solamente riba palabranan menos uza, pero tambe lo promove varios dicho y proverbionan na Papiamento.
Di e forma aki Fundacion Go Cultura tambe ta sigui brinda su aporte na comparti nos herencia cultural y haci specialmente nos hobennan mas interesa, curioso y consciente di nos identidad.
Go Cultura ta invita bo pa siña mas di nos idioma y haya sa cua ta e palabranan arcaico di nos idioma, pues palabranan menos uza pero cu ta importante y interesante pa nos conocemento general y cu kizas nos por cuminsa uza frecuentemente atrobe den nos dushi Papiamento.
