Hopi ta esnan cu kisas no ta conciente kico realidad ta bida di un piscado na momento cu e subi lama. E dificultad y retonan riba lama den mayoria caso ta dificil pa logra yega na algun kilo di pisca . Tin biaha e por ta faborabel y tin biaha e por ta uno menos faborabel tambe. Manera e piscadonan mes ta bisa “awe no tabata un bon dia”. Sin conta mes na otro retonan tambe cu ta existi. E ta conta pa esnan cu ta pisca den boto of na baranca. Semper ta keda e espacio pa duna atencion y mehoracion den e sector aki di pesca na Aruba.
For di algun siman ta bin ta tumando lugar diferente bishita. E bishitanan aki ta di minister sr. Ursell Arends cu ta encarga cu Sector di Pesca di Aruba cu ta bishita diferente pier y gruponan di piscado pa asina por scucha y dialoga riba e diferente tema y inkietud di mayoria piscado. Den transcurso di simannan ya caba a bishita varios gruponan di piscado y tambe e diferente pier rond Aruba. Tur esaki ta den cuadro di trece mehoracion den e sector di pesca aki na Aruba.
Ainda tin mas grupo /piernan di piscado cu lo bai wordo bishita pa minister sr. Ursell Arends teniendo na cuenta cu su schedule bastante ocupa. Dado caso cu kisas tin piscadonan cu ainda no a wordo bishita por keda pendiente paso tur lo yega na nan turno. Por contact Departamento di Agricultura, Cria y Pesca Santa Rosa na e email adres cu ta info@santarosa.aw pa asina manda nos bo informacion pa asina minister por hasi e bishita desea y intercambia di idea, puntonan di importancia y mehoracion pa e sector aki.
