Mescos cu aña pasa, un delegacion di Fondo Nacional di Restauracion di Hulanda (NRF) a
bishita Aruba y Stichting Monumentenfonds Aruba (SMFA) en particular. SMFA a mustra
mas tanto di e proyectonan posibel den un programa cortico y a splica proyectonan cu ta
den preparacion. SMFA ta trahando cu NRF desde 2009. A base di prestamonan cu interes
abou duna pa NRF, SMFA por yega na fondo pa restauracion di monumentonan.
Harry Kers, account manager pa Caribe, a bishita Oranjestad diamars 19 di november den
oranan di atardi y a ricibi un recorido extenso di tres diferente proyecto for di Daphne
Every, lider di proyecto di SMFA.
Uğur Özcan, director, y Coen Reinders, gerente di Partners & Operations, a bishita Aruba
diahuebs 21 di november. Hunto cu e representante di Hulanda, Vincent Storimans y un
delegacion di Banco Central di Aruba, nan tabatin un recorido cortico den e ciudad pasando
varios proyecto di SMFA y empresarionan priva. Despues SMFA a duna un presentacion
tocante e colaboracion cu e Fondo di Restauracion. E diferente prestamonan otorga den
pasado a wordo usa, entre otro, pa restauracion di e Torennan di Awa di Oranjestad y San
Nicolas, e Nicolaas Store, California Lighthouse y Botica Aruba.
Despues di e presentacion, Sr. Uğur Özcan a presenta y firma e oferta pa financiamento di
Cas Veneranda na e presidente di SMFA, Sra. Rousanne de Weever. Esaki ta marca e paso
final pa financiamento di e proyecto y ta permiti SMFA finalisa e restauracion. Ta antisipa
finalisacion di Cas Veneranda na fin di 2025.
SMFA a expresa su gratitud pa e sosten y cooperacion a largo plaso cu NRF y a expresa e
speranza cu por restaura mas monumento den futuro cu ayudo di prestamo di interes abao
for di Hulanda.