TCB ta informá
Tourism Corporation Bonaire (TCB) a kompartí informashon turístiko preliminario pa luna di mei 2025, for di kua ta resultá ku Boneiru a risibí 14.962 bishitante stayover. Esaki ta un oumento di 13,9% kompará ku luna di mei 2024, ora ku 13.133 bishitante a yega nos isla.
E bishitantenan for di Hulanda a forma e grupo di mas grandi, representando 40% di e kantidat total di bishitante (6263). E bishitantenan for di Merka tabata e di dos grupo mas grandi, esta 31% di e kantidat total di bishitante (4639).
En total 2151 bishitante (14,4%) for di Kòrsou a bishitá nos isla, siguí pa Aruba ku 319 bishitante (2,1%), Alemania ku 252 bishitante (1,7%), Bélgika ku 149 bishitante (1%), Canada ku 146 bishitante (1%), Colombia ku 134 bishitante (0,9%), Suisa ku 106 bishitante (0,7%) i Reino Uní ku 81 bishitante (0,5%).
Mayoria di e bishitantenan merikano a biaha huntu ku un partner, siguí pa e bishitantenan ku ta biaha nan so. Mayoria a bini pa vakansi (48%), sambuyamentu (36,8%). Mayoria di nan a hospedá den un hotèl (50,6%), un vila (14,5%), un apartamento (7,5%), nan propio bibienda (5,5%) òf serka un miembro di famia (3,7%). E bishitantenan merikano a bini prinsipalmente for di Florida, New York, Texas, Colorado i California. E repartishon di edat ta mustra ku e biaheronan di edat mas haltu di 55 pa 64 aña a representá 22,3% di e bishitantenan, miéntras e biaheronan di 65 aña bai ariba a representá 18,3% di e bishitantenan.
Mayoria di e bishitantenan hulandes a biaha huntu ku un partner i despues ta sigui e bishitantenan ku ta biaha nan so. Mayoria bishitante a bini pa vakansi (65,1%) i pa bishitá amigu i famia (10,9%). Mayoria di e bishitantenan a hospedá den un hotèl (47,3%), siguí pa un apartamento (15,3%), serka un miembro di famia (10,7%), den un vila (5,7%) i den nan propio bibienda (4,4%). Mayoria di e bishitantenan hulandes a bini for di Noord-Holland, Zuid-Holland, Noord-Brabant, Gelderland i Utrecht, kaminda e grupo di edat di 55 pa 64 aña (23,7%) i e grupo di edat di 25 pa 34 aña (19,1%) a forma e segmentonan di mas grandi.
Pa mas informashon tokante Boneiru su prestashonnan turístiko, bo por bishitá www.bonaireisland.com òf tuma kontakto ku nos via email na info@bonaireisland.com.