TCB ta informá
Tourism Corporation Bonaire (TCB) a kompartí informashon turístiko preliminario pa luna di yüli 2025, for di kua ta resultá ku Boneiru a risibí 16.653 bishitante stayover. Esaki ta un oumento di 16,3% kompará ku luna di yüli 2024, ora ku 14.320 bishitante a yega nos isla.
E bishitantenan for di Hulanda a forma e grupo di mas grandi, representando 46,3% di e kantidat total di bishitante, ku 7710 bishitante. E bishitantenan for di Merka tabata e di dos grupo mas grandi, esta 27,4% di e kantidat total di bishitante, ku 4565 bishitante.
En total 2131 bishitante (12,8%) for di Kòrsou a bishitá nos isla, siguí pa Bélgika ku 362 bishitante (2,2%), Aruba ku 278 bishitante (1,7%), Suisa ku 196 bishitante (1,2%), Alemania ku 174 bishitante (1%), Canada ku 163 bishitante (1%), Colombia ku 149 bishitante (0,9%), Brasil ku 119 bishitante (0,7%) i Reino Uní ku 76 bishitante (0,5%).
Mayoria di e bishitantenan merikano a biaha nan so, siguí pa e bishitantenan ku a biaha ku un partner. Mayoria a bini pa vakansi (50,2%) i sambuyamentu (35,4%). Mayoria di nan a hospedá den un hotèl (52%), un vila (12,4%), nan propio bibienda (7,2%), un apartamento (6,5%) òf serka un miembro di famia (4,3%). E bishitantenan merikano a bini prinsipalmente for di New York, Florida, Texas, Pennsylvania i California. E repartishon di edat ta mustra ku e biaheronan di 45 pa 54 aña a representá 20,2% di e bishitantenan, miéntras e biaheronan di 55 pa 64 aña a representá 18,6% di e bishitantenan.
Mayoria di e bishitantenan hulandes a biaha ku nan yunan, siguí pa esunnan ku ta biaha nan so. Mayoria bishitante a bini pa vakansi (75%) i pa bishitá amigu i famia (8%). Mayoria di e bishitantenan a hospedá den un hotèl (44%), siguí pa un apartamento (14,8%), serka un miembro di famia (10,9%), den un vila (9,1%) i den nan propio bibienda (6%). Mayoria di e bishitantenan hulandes a bini for di Noord-Holland, Zuid-Holland, Noord-Brabant, Gelderland i Utrecht, kaminda e grupo di edat di 45 pa 54 aña (20,6%) i e grupo di edat di 18 pa 24 aña (16,6%) a forma e segmentonan di mas grandi.
Pa mas informashon tokante Boneiru su prestashonnan turístiko, bo por bishitá www.bonaireisland.com òf bo por tuma kontakto ku nos via info@bonaireisland.com.
