Tourism Corporation Bonaire (TCB) huntu ku 11
partner boneriano riba 1 ku 2 di febrüari 2025 a partisipá na e bolsa di buseo
Duikvaker na Houten, Hulanda.
Annette Emerenciana – Marketing PR & Project Coordinator di TCB i Jaedan
Crestian – embahador di Boneiru i studiante, a representá e stènt di TCB. E
partnernan di e Pavilion Boneiru pa e aña akí tabata 123 Car Rental, AB-Dive,
Captain Don’s Habitat, Chogogo Beach & Dive Resort, Dive Friends Bonaire, FPA
Sports Bonaire, Grand Windsock Bonaire, Oasis Guesthouse Bonaire, Scuba Elite
Bonaire, VIP Diving i WannaDive Bonaire. Banda di esakinan Buddy Dive Resort
tambe tabata presente ku nan propio stènt pafó di e Pavilion Boneiru.
Durante e bolsa ku a dura 2 dia, e Pavilion Boneiru a atraé i yama bon biní na míles
di bishitante i amante di buseo ku ya kaba a bishitá nos isla anteriormente i tambe
algun ku a yega di tende di Boneiru i ku dentro di poko ta bai plania un biahe pa nos
isla. E partnernan boneriano a ofresé paketenan atraktivo di buseo, akomodashon i
hür di outo, ku e bishitantenan por a buk mesora.
E aña akí tambe Boneiru tabata un di e partisipantenan na un rekorido di
deskubrimentu yamá ‘Duikexpeditie’ durante e bolsa di Duikvaker. E ‘Duikexpeditie’
ta un evento ku ta tuma lugá durante e bolsa di Duikvaker, kaminda muchanan por
kolektá steker na e stèntnan ku ta partisipá, despues di a hasi un tarea. Na e stènt di
TCB e muchanan mester a kontestá pregunta tokante Boneiru. Si nan a duna un
kontesta korekto, nan tabata haña oportunidat pa hunga un wega plasentero pa
gana un premio.
Dia 1 di febrüari e Pavilion Boneiru a organisá un evento di ret, na kua sentenáres di
ekspositor, bishitante i partnernan di medionan di komunikashon a partisipá. E
evento di ret a brinda Boneiru i su partnernan un oportunidat balioso pa hasi nan
visibilidat mas grandi serka ko-ekspositornan, bishitantenan di e bolsa i
representantenan di medionan di komunikashon, i di e manera akí fasilitá konekshon
i partnership ku otro skolnan di buseo, risòrtnan i kompanianan di hür outo. Nan por
a disfrutá di un variedat di pasaboka lokal, ku Cedric Soleana a traha i ku a aksentuá
e delisianan kulinario di nos isla. Tras di bar Alexander Tromp – embahador di
Boneiru i studiante – a sirbi e wéspetnan di e pavilion, miéntras e tabata kòmbersá
amenamente ku nan tokante Boneiru.
Boneiru su partisipashon na e bolsa di Duikvaker ta un parti krusial di un strategia di
merkadeo ku a keda diseñá pa hasi popularidat di nos isla mas grandi i pa mantené
su posishon komo e destinashon number unu pa buseo na kosta den region.
Gustosamente TCB ke ekspresá su gratitut na tur partner na nos isla ku a partisipá
na e bolsa di Duikvaker di e aña akí.