Pronto ta asina leu cu un parti di Caya Corona, cu na e momentonan aki ta bou di reconstruccion, ta cla y lo habri. Diputado encarga cu Desaroyo y Maneho di espacio y cu Trafico y Transporte, ta satisfecho cu e forma cu e trabounan den cuadro di ehecucion di e di dos fase di e proyecto pa drecha e caya principal aki, ta canando.
E mandatario ta consciente cu ceramento temporal di e ardu di trafico principal aki pa por ehecuta e trabounan, ta causando molester. Caya Corona ta esencial particularmente den oranan di mainta pa trafico di cas pa trabou y pa hiba muchanan scol. Na e momentonan aki por mira y experencia con trafico ta pega y ta formando fila na e conexion di Caminda di abao y Caya Amsterdam,for di dia cu scolnan a habri. P’esei gobierno di Boneiro ta haci maximo esfuerso, hunto cu e contratista, pa e proyecto di Caya Corona finalisa mas rapido posibel y asina alivia e trafico atrobe.