Fraccion MAN-PIN a bay SDK pa wak e situacion
Fraccion MAN-PIN den Parlamento a expresa su preocupacion profundo tocante e estado di diferente facilidadnan den Centro Deportivo Corsou (SDK), y a dirigi un carta cu pregunta y peticionnan na minister di Ensenansa, Ciencia, Cultura y Deporte, señor Sithree van Heydoorn.
Den ultimo añanan, Gobierno a inverti den drechamento di diferente veldnan deportivo rond di Corsou. MAN-PIN ta considera esaki un desaroyo positivo, pasobra deporte ta contribui na un estilo di bida salu y na e desaroyo di nos muchanan y hobennan. Sinembargo, e centro deportivo mas importante di e isla, SDK, ta sigui enfrenta problema serio di mantencion, siguridad y modernisacion.
SDK ta e curason di deporte na Corsou. Miles di deportista, scolnan, federacionnan deportivo y organisacionnan ta haci uso di e facilidadnan aki durante henter aña. No obstante, facilidadnan manera e pista di atletismo, e pisina Enith Brigitha, e sala deportivo Errol Rooi y e stadion di futbol ta mustra segnalnan cla di deterioro y falta di mantencion.
Fraccion MAN-PIN ta recorda cu aña pasa a anuncia cu lo drecha e pista di atletismo, cu anteriormente a sirbi como sede di evento internacional manera CARIFTA Games. Te awe no tin informacion cla tocante e progreso ni ehecucion di e proyecto.
Segun Fraccion MAN-PIN, e situacion actual ta afecta no solamente deportistanan di alto nivel, sino tambe scolnan, federacionnan deportivo y organisacionnan cu ta promove deporte den nos comunidad. Ademas, personanan cu un desabilidad ta haci uso di e facilidadnan aki pa entrenamento y preparacion pa competencianan internacional manera Special Olympics.
“Un pais cu ta kere den deporte mester inverti den facilidadnan deportivo cu ta sigur, moderno y bon manteni. SDK no por keda atras,” segun Fraccion MAN-PIN.
Pa e motivonan aki, MAN-PIN ta pidi na Gobierno pa duna claridad tocante e estado di e diferente proyectonan di rehabilitacion, y di forma concreto drecha y modernisa e facilidadnan di SDK.
