Diahuebs 11 di september, Prome Minister di Aruba, mr. Mike Eman, acompaña pa su señora Doina, a asisti na un ceremonia solemn den e area di U.S. Customs and Border Protection na Aeropuerto Internacional Reina Beatrix.
Riba e fecha aki, exactamente 24 aña pasa, un di e tragedianan mas grandi den historia moderno a tuma luga: e atakenan terorista contra e Twin Towers di New York, Pentagon na Washington D.C. y un avion cu a cay na Pennsylvania. Na total, mas cu 3000 hende a perde nan bida y hopi famia a keda marca pa semper. E suceso aki no solamente a sacudi Estados Unidos, pero tambe a cambia pa semper siguridad y regulacion den aviacion mundial.
Durante e ceremonia, Director di CBP estableci na nos isla, Sr. Roberts, a comparti un discurso profundo y emocional cu e invitadonan presente. Entre nan tabata Directora di Directie Buitenlandse Betrekkingen, Sra. Jocelyne Croes, Director di Aeropuerto Sr. James Fazio, y e personal di CBP. Mundo no mester lubida nunca e victimanan inocente y recordando nan, ta sigui honra nan memoria.
E momento solemn a sigui cu un oracion duna pa un agente di CBP, un acto di refleccion y union espiritual. Prome Minister Eman tambe a dirigi un discurso, expresando gratitud y solidaridad cu tur famianan y pueblonan afecta. Prome Minister Eman a subraya cu Aruba, a pesar di su tamaño chikito, ta parti di un comunidad mundial cu a sinti mesun dolor y cu ta sigui para firme contra terorismo.
Na final di ceremonia, Prome Minister Eman hunto cu su señora Doina a pone un bela na honor y memoria di tur esnan cu a perde nan bida den e tragedia cu a cambia mundo pa semper.
