Studiantenan di Haagse Hogeschool cu ta studia e minor ‘Relacionnan den
Reino’, a bishita Conseho Social – Economico (SER) den un evento cu a tuma luga na Boutique Hotel ’t Klooster na Pietermaai. Durante e bishita, nan a haña oportunidad pa siña mas tocante e trabou di SER, su rol como organo di conseho y consulta na Corsou, den Reino Hulandes y internacionalmente. Ademas nan a ricibi informacion tocante posibilidad nan di core stage cu por contribui na nan desaroyo profesional.
E evento a cuminsa cu un presentacion detaya di e funcion y posesion central di SER den nos estado di derecho. Como organo consehero di gobierno y di Parlamento riba asuntonan socioeconomico, tambe e ekipo tecnico di SER ta duna sosten na e plataformanan dialogo laboral den sector publico manera Comision Central di Sindicatonan (CCvV) y Consulta Central Organisa pa Asuntonan di Funcionarionan Publico (CGOA).
E presentacion a duna e studiantenan e oportunidad pa siña mas di acerca tocante e proceso di desaroyo di y conseha riba maneho publico y e retonan di mantene un economia relativamente chikito den e contexto di un reino mas grandi.
Un momento importante durante e bishita tabata e deliberacionnan tocante posibilidad nan di core stage cu SER ta ofrece. E studiantenan a siña con nan por contribui den operacionnan diario di SER pa haña experencia practico cu tin un balor agrega pa nan desaroyo academico y profesional.
E forma interactivo di e sesion a yama atencion. E studiantenan a haci preguntanan riba tema manera formulacion di maneho socioeconomico, colaboracion socioeconomico y e manera cu SER ta kontribuí pa fortalece lasonan den Reino y internacionalmente. E discusionnan aki a enfatisa e beneficio mutuo di e colaboracion entre Haagse Hogeschool y SER di Corsou.
E programa formal a cera cu un lunch informal, unda e studiantenan y e asesor nan di SER a hiba dialogonan y intercambionan den un ambiente relaha. Esaki a brinda nan e oportunidad pa intercambia experencianan y fortalece lasonan di un forma spontaneo.
Esaki ta e di cuater aña consecutivo cu Haagse Hogeschool ta bishita SER di Corsou. E bishitanan aki a
demostra di reforsa e importancia di adkiri conocemento practico dor di hobennan interesa den materianan socioeconomico. E obhetivo di SER no ta pa solamente inspira talento hubenil pa aporta den su trabounan diario, sino tambe pa contribui activamente na desaroya un generacion di profesionalnan hoben cu por asumi un rol importante den progreso socioeconomico di e isla.
Haagse Hogeschool y SER di Corsou ta satisfecho cu e resultado di e encuentro y a expresa nan deseo mutuo pa continua cu e tradicion util aki e añanan binidero.
