E siman cu a pasa, Cinearuba su bestuur a tuma despedida di 2 miembro activo cu despues di 13 aña no lo ta forma parti mas di e fundacion.
Ta trata di Raphaela Mahadeo y Addonsito Croes. Ambos miembro a cera conoci cu e fundacion 13 aña pasa, tempo cu e pelicula clasico Arubano ABO SO tawata lansa na Aruba. Hunto cu un elenco grandi consistiendo di eo. Miguel Genser, Tyron de Freitas, Daphny Martijn, Lionel Dorothal y Valerie Croes, tanto Raphaela Mahadeo como Addonsito Croes a hunga rolnan importante den ABO SO. Hasta tata di nos cultura Padu Lampe dfm. tawata parti di e pelicula. Aki particularmente Addonsito a participa den su prome pelicula como actor. Esaki tawata e comienso di e serie di e total 9 otro peliculanan cu a sigui despues.
Desde e tempo ey e fundador Juan Fransisco Pardo a invita Addonsito, Raphaela y Luty Martinez pa forma parti di fundacion Cinearuba.
Despues di e bunita aporte brinda na e fundacion, e dos miembronan a dicidi cu ta tempo pa brinda otro persona e oportunidad pa ta den e bestuur.
Pa e motibo aki, e fundacion a organisa un cena special pa nan dos. Presente tawata Juan Fransisco Pardo, Luty Martines, Adriano Nanof, Raphaela Mahadeo y Addonsito Croes. Tanto Addonsito como Raphaela a desea Cinearuba tur exito di mundo y a gradici pa cada un di e oportunidadnan ricibi. Tres aña pasa, Cinearuba a honra Addonsito y Raphaela pa nan 10 aña di miembresia activo.
