ORANJESTAD, Aruba
Durante un conferencia di prensa dialuna ultimo, CEO di Aruba Tourism Authority (A.T.A.), Ronella Tjin Asjoe-Croes a anuncia cu entrante 20 di juli, 2020 tur compania cu no tene nan mes na e protocolnan di Departamento di Salud Publico (D.V.G.) por yega na perde nan seyo di Aruba Health & Happiness Code (HH Code).
A.T.A como tambe D.V.G. a tuma nota di diferente publicacion riba rednan social caminda por mira con cierto establecimentonan na Aruba no ta tene nan mes na e protocolnan di Aruba Health & Happiness Code manera stipula pa D.V.G. Pa medio di e programa di HH Code, DVG conhuntamente cu A.T.A. lo por actua riba nivel di falta di mantencion di reglanan pa cu higiena, stipula como rekisitonan como parti di e programa aki. Esaki conforme ley bou di cual DWH (Dienst Waren en Hygiene) ta traha.
No mantencion na reglanan ta di lamenta, mirando cu ainda Aruba y mundo henter ta den un bataya contra COVID-19. Awo cu nos fronteranan a habri, ta di suma importancia pa nos mantene nos mes na e reglanan di higiena, como tambe distancia social.
Pa por sigura cu e esencia y importancia di e Aruba Health & Happiness Code ta keda mantene su relevancia y ta ser respeta, A.T.A. conhuntamente cu D.V.G. a introduci metodonan unda por kita ambos seyo, esun di color y/of esun di oro, dor di incumplimento di e rekisitonan di e programa di HH Code; E prome maneho ta basa riba e forma di “2 strikes and you are out” caminda companianan cu ricibi un ‘waarschuwing’ di parti di DWH pa no cumpli cu e protocolnan, lo haya e oportunidad pa haci ahustacion prome cu e siguiente control. Esaki lo wordo anota den e programa como e prome “strike” pa cual e compania lo ricibi un notificacion. Si e establecimento aki haya un di dos advertencia, lo bay over na kita e seyo di Aruba Health & Happiness Code for di e establecimento aki, pues esaki ta conta como e di dos “strike”. Ademas si DWH despues di inspeccion pasa pa cera un establecimento, den e caso aki lo pasa pa kita e seyo di e compania inmediatamente. Pa DWH yega e punto aki tin motibonan cu ta bastante pisa pa cu ausencia di higiena y pues no por wordo carga pa un programa manera esun di HH Code.
Tur compania cu perde nan seyo por inicia e proceso pa recupera esakinan y mester simplemente cuminsa e proceso di nobo! Locual lo afecta e compania grandemente ta cu e no lo bin na remarke pa un periodo di algun luna, mirando cu e enfoke pa cu e programa di HH Code ta basa awo riba e faceta di inspeccionnan y otorgamento di e seyo di otro. Ainda tin hopi compania cu lo ricibi nan inspeccion simannan y lunanan cu ta sigui y partidonan kier finalisa e fase di e programa aki debidamente, pa despues bay bek na esnan cu ta na inicio di aplicacion.
Ta haci un apelacion na cualkier persona cu pasa den un experiencia caminda un establecimento (cu tin e seyo di Aruba Health & Happiness Code) no ta tene su mes na e protocolnan stipula di, entre otro higiena, pa raporta esaki na feedbackhealthcode@aruba.com. Di e forma aki por controla e validez di e situacion y informa instancianan concerni cu por tuma medidanan necesario.
-FIN-