Cornelis Wilson, un profesional Arubiano pensiona y planeado di desaroyo, a comparti su experencia y preocupacionnan despues di e ultimo eleccionnan na Leiden, Hulanda. Wilson, kende a participa activamente cu e partido local ‘Partij Sleutelstad’, ta enfatisa e necesidad di kibra cu e maneho tradicional di coalicion pa realisa cambionan cu berdad ta beneficia e pueblo.
Wilson, kende a nace na Aruba y a biba hopi tempo na Boneiro prome cu el a establece su mes na Hulanda na aña 1999, ta mira e resultadonan di su partido como un logro historico. ‘Partij Sleutelstad’ a logra redobla su representacion, pasando di 3 pa 6 asiento den conseho municipal. Sinembargo, e satisfaccion pa e crecemento aki ta wordo opaca pa e realidad politico di e formacion di un coalicion nobo.
E reto di e coalicionnan tradicional Segun Wilson, e problema principal ta keda e coalicion cu a goberna anteriormente, cual a logra mantene e mayoria necesario pa sigui den poder. El a expresa su lamento cu e no a logra convence e partidonan mas grandi pa busca aliansanan nobo y kibra cu e structuranan tradicional prome cu e campaña electoral.
“E partidonan tradicional den e coalicion actual ta inclui D66, PvdA, GroenLinks y CDA,” Wilson a splica. Pa e planeado di desaroyo, e sistema aki hopi biaha ta sirbi interesnan di locual el a yama “schaduwmachten” (podernan den sombra), caminda e desaroyo ta wordo dirigi pa interesnan particular y no necesariamente pa esunnan di e poblacion.
Un vision diferente pa politica local Wilson ta subraya cu ‘Partij Sleutelstad’ y ‘Studenten voor Leiden’ ta e unico dos partidonan na Leiden cu no ta wordo domina pa structuranan nacional manera VVD of D66. Su meta principal ta pa introduci un forma di traha politica cu no ta basa solamente riba e manera tradicional, sino den crea aliansanan di confianza y ayudo mutuo cu ta pone e interes di e pueblo prome.
Compromiso continuo A pesar cu e no tin un posicion salarial den e maneho nobo, Wilson ta afirma cu su compromiso cu e ciudad di Leiden y su desaroyo ta keda firme. “Mi ta keda activo den e concepto di traha pa e comunidad, maske mi ta biba di mi pension,” el a declara, agregando cu un humor sutil cu e lo por biba hopi mihor si Aruba lo a paga su pension completo.
Cornelis Wilson ta keda un ehemplo di con e diaspora Arubiano na Hulanda ta sigui contribui cu nan conocemento y experiencia pa mehora e calidad di bida den nan comunidadnan nobo, sin lubida nan raisnan y e necesidad di transparencia den gobernacion.
