KRALENDIJK,Bonaire
Awe ta Dia internashonal kontra trabou di mucha. Riba e dia aki mundialmente nan ta pidi atenshon pa tur mucha ku ta traha. Mundialmente 152 mion mucha ta traha komo obrero infantil, di kua 73 mion mucha bou di sirkumstansianan peligroso. UNICEF ta haña trabou di mucha inaseptabel.
Trabou di mucha ta roba un mucha entre otro di su derecho riba enseñansa. Pa motibu di trabou di mucha e muchanan no tin posibilidat mas pa ta nòrmalmente mucha i nan ta sufri físikamente i mentalmente bou di esei.
Gobièrnu di Boneiru ta duna hopi balor na desaroyo di un mucha i ke promové ku tur mucha mas tantu posibel por ta mucha i haña oportunidatnan honesto. Por sierto no ta nos mes ta skohe e lugá kaminda nos a nase i e promé añanan di nos bida tin influensia grandi riba nos desaroyo mas aleu. Hubentut no ta solamente nos futuro, pero nos presente tambe. Awor aki ta e momentu ku nos mester kuida nos muchanan, di manera ku nan por desaroyá nan mes kompletamente.
Pa e motibu aki gobièrnu di Boneiru ta kontentu ku proyektonan manera festival di pelíkula di UNICEF tokante derecho di mucha. E festival di pelíkula ta laga nos muchanan pensa na un manera kreativo riba derecho di mucha. Seguidamente nan ta bai okupá nan mes aktivamente ku e derecho ku nan a skohe.
Banda di esei ta di importansia ku nos ta wak nos mes tambe. Komo komunidat nos por kontribuí ku nos granito na kombatimentu di trabou di mucha, mediante entre otro ser konsiente di orígen di e produktonan ku nos ta kumpra.
Un mensahe final di diputado Nina den Heyer:
‘Nos ta komprendé ku e krísis aktual tin un impakto grandi riba nos komunidat. Tòg nos ta pidi nos komunidat pa salbaguardá un ambiente seif pa nos muchanan.’