E proyekto agrikultura, krio di bestia i peska (LVV) ta organisá dos enkuentro pa informá doñonan di kabritu i karné tokante e sistema di identifikashon i registrashon ‘Identificatie en Registratiesysteem’ (sistema I&R).
E enkuentronan ta dia 2 i 4 di ougùstùs di 1:30’or pa 3:30’or di mèrdia. Tin lugá pa maksimalmente 20 persona pa kada enkuentro.
E sistema I&R ta un kombinashon di registrashon online di kabritu i karné i markamentu di e bestianan. Asina ta registrá tur informashon tokante e bestia. Esaki ta yuda ora ta registrá ken ta doño i ku prevenshon di enteelt serka e bestianan. Durante e enkuentronan, LVV ta demonstrá kon doñonan di kabritu i karné por registrá nan bestianan online i kon nan por marka e bestianan.
LVV ta hasi un yamada na doñonan di kabritu i karné pa reservá un lugá lihé asina nan por ta presente. Personanan interesá por reservá un lugá yamando 717 8836 òf 717 6734. Tambe por pasa na ofisina di LVV pa reservá un lugá. Si tin un kantidat haltu di inskripshon, LVV lo plania enkuentro èkstra.
LVV ta organisá enkuentro pa doño di kabritu i karné
