ORANJESTAD,Aruba
Un biaha mas ta keda demostra cu gabinete Wever Croes no ta nunca sincero cu pueblo di Aruba, ya cu mientras cu constantemente ministernan ta papia di e crisis serio cu e pais ta pasando aden, di otro banda tin decisionnan ta ser tuma cu ningun hende por compronde y tampoco hustifica.
Melvin Tromp miembro di partido AVP ta mustra cu den un situacion di crisis, ta responsabilidad grandi di gobierno, pa percura pa tin trankilidad, percura pa tin solucion pa alivia e situacion serio aki.
“Nos tin un Prome Minister cu practricamente pa dos luna largo, tur anochi tabata corda pueblo con serio e situacion ta, tanto pa salud di nos hendenan como pa e situacion economico y laboral.
Como alivia temporal a introduci e sistema di FASE caminda ta subsidia esunnan cu a perde nan trabou of no por a traha debi na e lockdown introduci, caminda cu financiamente di Hulanda, e hendenan aki por a cobra e sma di 950 florin.
Un proceso cu no a cana mucho efectivo caminda hopi trahado ainda ta sperando riba e ayudo aki pero cu nunca a yega, mientras cu gobierno mes ta luchando cu Hulanda pa haya placa pa atende cu su propio situacion financiero.
Siman pasa caba mi persona a cuestiona e hecho cu den henter e crisis aki, caminda hopi hende a ser manda cas, gobierno ta permiti cu un compania cu lo bay forma parti di ehecucion di un proyecto den WEB Aruba NV, ta dicidi cu e lo bin cu alrededor di 100 trahado for d Corsou.
Pa completa obra, Minister di Labor Glenbert Croes ta declara na prensa cu Aruba tin un porcentahe di desempleo c u ta 71% di e forsa laboral y a insisti cu e situacion ta serio.
Sinembargo mi kier a puntra e Minister aki, con serio e ta den su preocupacion pa e situacion dramatico aki den sector laboral ya cu tin otro desaroyonan cu ta mustra cu gabinete Wever Croes mes ta actuando contra interes di nos hendenan, di e clase trahado.
Na momento cu mi a haci e denuncia aki siman pasa caba, Minister Glenbert Croes a dicidi di manda mensahe rond riba entre otro Facebook y social media, bisando cu no tin ningun trahado di exterior cu lo bin traha na Aruba.
Sinembargo Minister Glenbert e ora tin cu splica di con e compania Dick and Doof Contractors BV cu ta situa na Corsou ta duna trahadonan un carta cu cual nan por bin traha na Aruba cuminsando otro siman dia 20 di Juni 2020.
Contenido di e carta ta mustra bon cla cu e persona cu su nomber ta aparece riba e carta ta un ‘soldador \ tubero’ y cu su contracto lo ta pa seis luna mientras cu e carta ta splica bon cla cu e lo tin cu bay traha den WEB Aruba NV.
E carta ta uno di referencia cu cual e lo por regla su permiso di trabou y di estadia, dunando e impresion cu gobierno ta reglando e posibilidad aki cu e tipo di permiso aki lo por cana mas lihe cu por.
Minister Glenbert Croes cu ta asina preocupa cu e porcentahe halto di desempleo, cu ta sigura riba facebook cu ningun trahado di afo lo bin traha na Aruba, aclaria pa pueblo di con e proceso aki di un compania di Corsou pa manda un grupo cu nos tin informacion concreto cu lo ta di 100 trahado, pa bin traha aki y laga nos hendenan mes sin trabou un banda.
Si Glenbert Croes no tin nocio di e desaroyo aki anto algo ta hopi malo mes, caminda cosnan ta pasa den nos pais, perhudicando nos propio profesionalnan y ta trece hendenan for di Corou di nacionalidad Venezolano pa bin yena un cupo di trabou cu nos hendenan aki mes tin mester di dje.
Mi a hasta informa Minister Glenbert Croes, cu ya caba tin dos container di e compania menciona, staciona caba riba tereno di WEB Aruba NV pero asina mes manera su gobierno bin ta haciendo for di prome dia cu nan a sinta, ta di gaña pueblo y bira haci net lo contrario,” Melvin Tromp di partido AVP a declara.