Entidad Publico Boneiro (EPB) ta pidi atencion pa hende cu demencia y nan sernan queri. Na Boneiro e persona ta central, no e mefrop/malesa. Un persona cu demencia tin su mesun historia di bida, deseonan y posibilidadnan.
Entidad Publico Boneiro tambe ta contribui cu un granito y ta trahando riba un maneho di demencia pa henter nos isla, den sincronisacion cu ministerio di Salubridad, Bienestar y Deporte (VWS), y Cuido y Hubentud Hulanda Caribense (ZJCN). Diferente organisacion for di cuido y bienestar, entre otro Fundashon Alzheimer Bonaire y Stichting Mantelzorg Bonaire, ta envolvi cu esaki.
E meta ta pa hende cu demencia haya guia, tratamento y cuido addecuá, y pa nan participa mas tanto tempo posibel den nos comunidad. Direccion propio y calidad di bida ta puntonan di salida importante den esaki. Ta envolvi nan sernan queri activamente y na un manera equivalente.
Entidad Publico Boneiro ta sostene iniciativanan concreto tambe. Un ehemplo di esaki ta cu EPB ta subsidia Fundashon Alzheimer Bonaire (FAB) pa entre otro un ora di informacion y consulta tocante demencia. E aña aki FAB ta existi 15 aña y tur e tempo ey nan a compromete nan mes pa mas concientisacion, conocemento y informacion tocante demencia y pa sosten pa hende cu demencia y nan sernan queri. Awe riba Dia Mundial di Alzheimer, directiva di FAB a entrega diputado Silberie e Reporte Mundial tocante Alzheimer 2026 (World Alzheimer Report 2026). Tur aña e fundacion ta haci esaki.
Banda di esaki Entidad Publico Boneiro ta envolvi cu desaroyo di e Trayecto di Cuido y Bida Demencia. Den corto tempo e Trayecto di Cuido y Bida ta bira disponibel via website di EPB.
Un comunidad caminda hende cu demencia por sigui participa, ta rekeri comprension y atencion di tur hende. Pa medio di reconoce demencia y papia tocante esaki, nos por contribui na un ambiente caminda hende cu demencia y nan sernan queri ta sinti nan mes sosteni.