Diamars mainta, un situacion di emergencia a tuma luga den edificio unda Departamento di Integracion, Maneho y Admision di Stranhero (DIMAS) y Departamento di Labor ta estableci, despues cu un empleado di Departamento di Labor a cuminsa sinti malo aparentemente debi na un posibel contaminacion di gas.
Poco despues, algun otro empleado di Departamento di Labor a presenta sintomanan similar. A transporta algun persona cu ambulance pa hospital pa control medico adicional, mientras cu algun a scoge pa bay hospital cu nan propio transporte pa haci control medico.
Despues di e yamada inicial, Polis, Ambulance y Cuerpo di Bombero a yega na e sitio y a haci un evaluacion amplio di e situacion pa exclui cualkier riesgo potencial pa personal y publico presente den y rond di e edificio.
Despues di evaluacion, Brandweer a tuma decision pa evacua henter e edificio pa resto di diamars, pa duna autoridadnan competente oportunidad pa continua cu nan investigacion y inspecciona e edificio pa determina si tin presencia di un of otro riesgo potencial.
Cu esaki, DIMAS a permanece cera pa resto di diamars 15 di juni 2026. E intencion ta pa reanuda operacionnan normal diahuebs 16 di juni 2026, semper y cuando autoridadnan competente confirma cu e edificio ta sigur pa uzo.
Relaciona cu clientenan cu tabatin cita pa diamars atardi, DIMAS lo contact nan pa reprograma e citanan pa diabierna awo.
DIMAS ta aprecia e cooperacion y comprension di tur persona afecta durante e situacion aki y ta desea tur empleado cu a sinti malo pronto recuperacion.
DIMAS temporalmente evacua despues di posibel contaminacion di gas
