Diputado Nina den Heyer ta preokupá tokante e echo ku ministerio di Asuntunan Ekonómiko i Klima ta tarda pa tuma un desishon tokante un proposishon di invershon ku e Kompania di Awa i Koriente di Boneiru (WEB Bonaire NV) a entregá. E plannan di WEB lo kondusí na tarifanan di koriente mas abou pa suidadanonan i empresanan.
‘Na aña 2019 a presentá e proposishon na e ministerio. Nos ta dos aña mas leu i te ainda nan no a tuma un desishon. Entretantu komo konsekuensia di preis di petroli e tarifanan a subi drástikamente. Esaki no tabata nesesario si nan no a keda hiba konsulta sin fin tokante e proposishon di WEB. Mi ta hopi desepshoná den e gabinete akí ku te ainda no a kumpli ku e inisiativa di WEB, ku tur e konsekuensianan negativo ku esaki ta trese kuné pa komunidat boneriano.’
Diputado Den Heyer ta enfatisá ku e plan di WEB ta kompletamente den liña ku maneho di gabinete: ‘Gobièrnu hulandes a primintí di lo traha riba redukshon di kosto di bida, pero den kuadro di e diskushon tokante klima nan ke tambe pa produkshon di energia bira sostenibel. Tweede Kamer asta a aseptá un moshon pa esei, den kua tin pará ku gabinete mester pone e medionan nesesario disponibel pa esaki. Tòg nada no ta pasa. Di e manera akí atrobe mas hende ta resultá bou di e límite di pobresa.’
Pa motibu di oumento di preis di petroli e tarifa di koriente na Boneiru for di yanüari 2020 a subi ku 25%. Por atribuí esaki totalmente na e problemátika (internashonal) di kombustibel, sino WEB lo por a implementá un redukshon (leve) di e tarifa. Debí ku pa motibu di e demanda ku ta oumentando, mester importá kada biaha mas petroli – i petroli mas karu -, e subida di tarifa lo kontinuá. Ehekushon di e plan di invershon di WEB, kompará ku e tarifa aktual, ta kondusí na un bahada paso pa paso di asta 50% na aña 2030. Si pa mas tardá na luna di òktober no logra un akuerdo ku e ministerio, WEB ta hañ’é obligá di invertí den kombustibel fósil, loke netamente lo tin un efekto negativo riba e tarifa.
1 comment
[…] Source link […]