E tim di desaster di Entidat Públiko Boneiru ta disponé di dos telefòn ku ta komuniká ku otro via di un satélite. Ku e aparatonan aki por hasi yamada si e ret di telefòn kai afó. Tabata Quinton Stroop di Telbo ku a entregá e telefònnan na gezaghèber Edison Rijna.
Hopi promé ku e temporada di orkan a kuminsá, ku ta kore di promé di yüni te ku fin di novèmber, ya kaba e tim di desaster a prepará. Kumpra e telefònnan ku komuniká ku otro via di satélite tabata un di e prioridatnan di e tim di desaster. Telbo ta un di e kompanianan di telekomunikashon ku ta den e tim di telekomunikashon ora tin un kalamidat.
Riba e wèpsait di di Entidat Públiko Boneiru por haña diferente konseho kon prepará awor ku e temporada di di orkan a kuminsá. Bishita www.bonairegov.com pa mas informashon.