Dutch Caribbean Nature Alliance (DCNA) ta honrá di por yama Su Altesa Prensès Beatrix bon biní ku su bishita binidero na Boneiru i Sint Eustatius den luna di novèmber. E bishita lo ta den signo di naturalesa i komunidat, i ta aksentuá e laso fuerte entre e komunidatnan di e islanan i nan patrimonio natural úniko.
Durante su bishita, Prensès Beatrix lo haña sa mas tokante inisiativanan lokal di konservashon i restorashon. DCNA ta kontentu ku e okashon spesial akí ta brinda un oportunidat pa destaká e trabou importante di nos partnernan lokal di maneho di parke, STINAPA Boneiru i STENAPA Sint Eustatius, ku ta hunga un ròl di lider den protekshon i restorashon di e ambiente natural di e islanan.
“Nos ta orguyoso ku nos por risibí Prensès Beatrix, i kompartí e dedikashon i logronan di e hopi organisashonnan ku diariamente ta traha duru pa protekshon i restorashon di e ambiente natural di nos islanan”, segun Arno Verhoeven, direktor di DCNA. “E bishita akí ta un oportunidat balioso pa fiha atenshon nashonal i internashonal riba e ròl krusial di naturalesa pa nos komunidatnan i nos ekonomianan, i pa e resiliensia di futuro.”
E bishita ta tuma lugá tambe na un momentu ku DCNA i su partnernan a lansa e Programa pa Konservashon i Restorashon di e Habitatnan Mas Importante. E inisiativa di mas aña akí ta enfoká riba protekshon i restorashon di sinku ekosistema krítiko na tur e seis islanan di Karibe Hulandes: ref di koral, kama di yerba di laman, mondi di palu di mangel, mondi tropikal seku i mondi tropikal húmedo. Pa medio di kolaborashon, kompartimentu di konosementu i akshon dirigí, e programa tin komo meta pa garantisá ku e ekosistemanan akí ta sigui proveé servisio esensial pa tantu naturalesa komo hende.
Pa medio di trese e proyektonan akí bou di atenshon durante bishita di e Prensès, DCNA i su partnernan ta spera di inspirá sosten kontinuo pa e esfuersonan di konservashon i restorashon den henter Karibe Hulandes.
