Na SGB alumnonan di VMBO for di 28 di sèptèmber te ku 2 di òktober ta haña enseñansa riba distansia. E motibu pa esaki ta ku algun dosente di VMBO ta den karentena preventivo pasobra nan tabatin kontakto estrecho ku un di e dos koleganan ku a tèst positivo pa COVID-19. P’esei no ta posibel pa e dosentenan aki pa ta físikamente na skol durante e periodo aki. E riesgo pa kontagio pa alumnonan ta chikitu, p’esei karentena no ta konta pa e alumnonan. Mas tantu posibel e lèsnan lo kontinuá riba distansia segun e roster di kustumber.
VMBO na SGB a prepará su mes bon pa fasilitá enseñansa riba distansia. E skol ta proveé e medionan elektróniko nesesario pa e alumnonan por partisipá na e lèsnan riba distansia i e dosentenan ta prepará pa duna lès for di kas. A proveé alumnonan di klas 1 te ku 3 ku medionan elektróniko pa asistí na e lèsnan for di nan kas mes. Alumnonan di klas 4 ku ainda no ta disponé di e medionan nesesario por pasa buska esakinan na kuminsamentu di e siman aki na skol.
Departamentu di Salú Públiko i skol lo sigui tene kontakto estrechamente ku otro durante e simannan binidero, pa por sigui monitoriá e situashon adekuadamente.