Directie Volksgezondheid (DVG) ta haci un
yamado pa accion na tur ciudadano pa tuma responsabilidad inmediato den
reduccion di criaderonan di sangura riba nos isla.
Investigacion den barionan rond Aruba ta mustra cu apesar di esfuerzo continuo di
seccion di GKMB canando cas pa cas educando y concientisando comunidad, ainda
ta encontra hopi cas y localidad cu awa para of acumula innecesariamente. Cada
caminda cu awa ta keda para ta un potencial criadero di sangura y un riesgo directo
pa bo famia y salud publico.
DVG ta enfatisa cu elimina awa para ta e paso mas urgente y efectivo pa corta e
cadena di reproduccion di sangura y reduci e cantidad di sangura adulto cu ta bula
rond.
Mirando e situacion regional, unda casonan di Chikungunya y Keintura Geel ta sigui
aumenta den paisnan cerca di nos, e nivel di alerta mester subi. Aruba no ta exclui
di e riesgo aki.
Ademas, DVG ta urgi comunidad pa conoce y reconoce e sintomanan di
Chikungunya y Keintura Geel. Si despues di biahe un persona presenta keintura,
dolornan fuerte den curpa, dolor di cabes of otro señal sospechoso, mester busca
atencion medico di inmediato y informa tocante su historia di biahe.
DVG ta infatisa cu prevencion no por wordo posponi. Proteccion di salud publico ta
depende di accion inmediato di tur ciudadano.
Kita tur awa para cerca di bo, tuma accion awe.
DVG ta sigui monitorea e situacion di cerca y lo sigui informa comunidad di cualkier
desaroyo relevante. Seccion di GKMB ta spuit den bario unicamente den caso di
casonan positivo di malesa transmiti pa sangura. Core rond y spuit manera antes no
ta responsable tampoco eficiente y no ta resolve e problema real cu ta cuminsa na e
awa cu ta keda para innesesariamente.
