Comision celebracion di dia nacional y UNOCA a uni Presidente di Comision celebracion di dia nacional Layonel Dirks ta duna di conoce cu ta forma un parthnership cu UNOCA pa asina engrandece cultura, pero principalmente Dande. Lo yuda diferente organisacionnan cu pa añanan largo ta organisa e festival di dande riba nos isla. E bon noticia ta cu e aña aki tin un total di 5 evento di Dande, esaki ta significa cu e interes ta keda crece pa cu nos festival di Dande.
E aña fundacion Chico Harms lo tin un show di Dande dia 27 di december, comision promove cultura cu competencia di Dande Infantil y Hubenil cu ta programa pa tuma luga dia 28 di december, Stichting arugalde e biaha aki tambe ta participa y ta forma parti hunto cu Comision celebracion di dia nacional pa yuda engrandece nan actividad di Dande cu ta tuma luga dia 29 di december y tambe tin fundacion festival folklorico cu ta conoci den pueblo cu nan Festival di Dande di Harry Croes den felis memoria cu su evento e aña aki tambe lo tuma luga dia 29 di december.
Algo mas cu ta bin acerca di e 4 festivalnan aki cu ya caba ta conoci , lo ta bay tin e aña aki un paranda di Dande riba trailer, esaki ta poni pa tuma luga dia 29 y 30 di december. Esaki ta un concepto diferente , pero cu ta spera cu e pueblo di Aruba gusta esaki pa engrandece e Dande na Aruba pa asina e Dande keda resona den tur skina di Aruba.