Mas ku 400 hende a bishitá e instalashon di Martis di Katalina Janga: di Antes pa Awor. For di 27 di yüli, pueblo di Boneiru por a bai Jong Bonaire kaminda pa medio di teknologia audiovisual, nan por a sigui e historia basá riba e lucha i legado di Martis di Katalina Janga. Tur dia tabatin tres funshon ku kada un por a tuma 20 persona, pero e interes tabata grandi, i hopi biaha e espasio tabata yen te ku 25 hende.
E reakshonnan tabata sumamente positivo:
“Tur mucha di skol mester mira e obra aki”
“Awor mi sa ken ta Martis di Katalina Janga, danki pa e trabou magnífiko di arte!”
Despues di kada seshon tabatin dialogonan profundo kaminda e bishitantenan por a ekspresá nan pensamentu riba e tema manera identidat, lucha pa libertat i importansia di konosé bo historia. Preguntanan manera “Si bo no sa bo pasado, bo no sa ken bo ta” i “Si Martis ta bini aworaki, lo e ta kontentu òf rabiá?” a habri tereno pa reflektá.
E produkshon aki a keda presentá pa SKAL, Plataforma NGO i Jong Bonaire. Un danki spesial ta bai na Boi Antoin i Fuhikubo pa nan kontribushon balioso na e kontenido. E obra ta skibí pa Segni Bernardina i dirigí produsí pa Rogen Pineda i su tim, ku a logra un transformashon teatral impreshonante den Jong Bonaire.
E eksperensia tabatin un komponente musikal, komponé pa Segni Bernardina i krea huntu ku Xechell i Xemio Jacobs. E anochinan a habri ku palabra di bon biní di parti di SKAL, siguí ku poesia i baile, i despues e públiko a drenta pa pasa e trayekto di mas o menos 30 minüt den e instalashon teatral.
SKAL ta gradisí tur hende ku a bishitá e instalashon di Martis di Katalina Janga: di Antes pa Awor i ta pidi pa keda pendiente:SKAL ta bai traha riba un lokalidat pa pone e instalashon na un lugá figo kaminda skolnan i komunidat por sigui bishit’é.
