E Oficina di Maneho di Crisis di Aruba cu orguyo ta anuncia e
lansamento oficial di un Early Warning System (EWS) moderno cu ta un avance importante den e
capacidad di Aruba pa maneha calamidad, sigurando cu alerta y informacion crucial ta yega na e
momento oportuno na publico durante situacion di emergencia.
E EWS, cu ta desaroya cu e tecnologia mas avansa y e miho practicanan den maneho di desaster, lo sirbi
como un herment crucial den e evento di desaster natural, desgracia di gran magnitud y otro situacion
di emergencia.
E sistema tin capacidad di manda alerta den tempo real y den e idiomanan principal di e isla, pa
habitante y tambe bishitante. E ta complementa pa medio di sirena y notificacion, otro plataforma,
incluyendo mensahe digital, media convencional y social.
"Awe ta marca un era nobo den Aruba su strategia pa maneho di emergencia," asina Rino Hermans,
Director di Crisis Management Office, a bisa. "E Early Warning System ta un herment vital cu lo yuda nos
proteha nos comunidad y nos isla di e impacto di desaster natural y otro emergencia. Nos ta encurasha
tur hende pa conoce y custuma cu e sistema pa asina saca e maximo probecho di su capacidad."
Diaranson y diahuebs proximo lo activa e sistema cu ta consisti di 8 palo di sirena y speaker pa scucha e
sirena pa prome biaha; dia 19 como prueba y dia 20 como parti di e dia internacional di simulacro yama
CaribWave. Den esaki tin diferente departamento, scol, entidad y negoshi local participando.
Aruba su EWS ta financia pa Union Europeo, Expertise France Groupe AFD, GFDRR y Banco Mundial pa
un suma di 1.7 miyon Euro. E tabata bou un preparacion cuidadoso durante ultimo shete aña. Awo e ta
cla pa pone Aruba como un pionero den e region di Caribe y riba e caminda pa cumpli cu e iniciativa
‘Early Warnings for All’ di Secretario General di Nacionnan Uni na maart 2022 cu ta pidi pa tur persona
na mundo ta proteha cu sistema di alerta trempan pa 2027.
Campaña Publico di Educacion
Hunto cu e lansamento, CMO ta ehecuta un campaña extenso di educacion pa sigura cu habitante y
bishitante ta consciente di con pa uza e Early Warning System. E campaña ta inclui sesion informativo,
material di instruccion y recurso online, entre otro. Sr. Hermans personalmente ta pasando na diferente
medio di comunicacion pa asina duna splicacion y tambe contesta pregunta di e ciudadanonan.
