Eksitoso Seminario ku Konseho di Partisipashon di Wardakosta

E balor di e Konseho di Partisipashon dentro di Wardakosta a demostrá su mes durante e
último 12 aña i mei, den resultadonan positivo di e Konseho aki. Ken mihó ku no ta bo propio
personal ku tin konosementu di loke ta sosedé na boka di trabou, ta rekonosé e retonan i tin e
kurashi pa deliberá esakinan dentro di e organisashon, ku e ophetivo di tin un mihó entorno
laboral.
Wardakosta a keda establesé na 1996 ku e meta, supervishon di laman den region di Karibe.
En konekshon ku su hubileo di 25 aña, Wardakosta a organisá djamars último un seminario ku
Konseho di Partisipashon, pa kompartí su konosementu i eksperensia pa loke ta trata e tópiko
aki ku diferente sosionan i partnernan stratégiko, ‘stakeholder’ i otro interesadonan. E
bentahanan di e partisipashon di e empleadonan pa medio di e Konseho di Partisipashon no ta
solamente di importansha pa nan, pero tambe pa e ehekutivonan den un organisashon. Asina e
organisashon ta haña solushonnan konhunto, pa asuntunan ku ta regardá e operashonnan di
gerensia. Un Konseho di Partisipashon tin un bos den operashonnan di gerensia i nunka ta
remplasá un sindikato. Un kantidat di ehèmpel di tópikonan ku ta keda tratá durante un
Konseho di Partisipashon ta: úniform, perspektiva di karera laboral, i kondishonnan laboral.
E Seminario di Konseho di Partisipashon di djamars último a ser habri ku un palabra di bon biní
di Direktor di Wardakosta, Frank Boots i tambe un palabra di apertura di Promé Minister Pisas.
Riba programa di e Seminario tabatin: Marco Sikkel, Konsehero di Partisipashon, Wim van
Lamoen, èks-lider di Sindikato, Hans Schreuder, èks Direktor Suplente di Wardakosta, Eugene
Middelhof, Direktor Suplente di Wardakosta i Roebunuck Matilda, Miembro di Konseho di
Partisipashon di Wardakosta. E meta di e seminario tabata pa kompartí e konosementu i
eksperensia pa loke ta regardá e Konseho di Partisipashon, ku entre otro e servisionan
Gubernamental, pa asina esakinan haña interes den e tópiko dentro di nan propio
organisashon. E seminario a klousura ku un pènel di diskushon ku e oradornan, kaminda e
invitadonan por a hasi nan preguntanan.