E laboratorio mas grandi y conoci na Aruba, conoci como “LabHOH”, awor ta acredita na norma internacional pa e siguiente tres aña. Ya caba nan tabata acredita y awo a haci e peticion di nobo y awor a logra acreditacion un bes mas pero pa un periodo mas largo. LabHOH ta responsabel pa mas di 80% di testnan laboratorio cu wordo ehecuta na Aruba. Pues p’e pashent, cliente y comunidad di Aruba, esey ta significa cu nan por ta trankilo y sigur cu e resultado y calidad di e testnan cu LabHOH ta diagnostica.
Awe ta un dia hopi importante pa nos cu e logro masha grandi di a haya acreditacion p’e siguiente tres añanan”, asina Junaica Donata, clustermanager a bisa felicitando e team di microbiologie di LabHOH. Ela gradici nan pa tur e empeño y esfuerso cu a hinca, esta orananan largo di trabou pa logra e acreditacion aki.
Johan Ubijaan, teamleider microbiologie, a duna di conoce cu e prome biaha di e proceso di acreditacion a scirbi y introduci tur proceso y awor durante e di dos biaha a demostra cu e procesonan ta cuadra y a implementa esakinan cu e efecto desea.
E prome paso di proceso di acreditacion ta haci un peticion, despues ta ricibi un evaluacion di e documentacion sigui pa un audit. For di e audit ta sali un raportahe cu tur loke falta y mester resolve. E team di auditors despues ta duna un conseho na e comision di “Raad voor Accreditatie”. Aki e comision ta duna aprobacion of nenga a base di e recomendacion di e team di auditors pa haya acreditacion, Ingmar Ramharakh, funcionario di calidad na microbiologie, a duna di conoce. E proceso aki tabatin un duracion di mas o menos seis luna. LabHOH a haci e peticion na februari y na augustus a haya e aprobacion pa e acreditacion pa e norma ISO15189.
E instituto renombra cu a acredita LabHOH ta Raad voor Accreditatie di Hulanda. E norma di acreditacion cu nan a haya ta ISO15189. Esaki ta un norma halto pa laboratorio medico y pa LabHOH esaki a hiba nan na un nivel hopi mas halto di cual nan tabatin caba. Aworaki nan proceso ta mas bou control y mas preciso. LabHOH ta responsabel pa mas di 80% di testnan laboratorio cu wordo ehecuta na Aruba. Pues p’e pashent, cliente y comunidad di Aruba, esey ta significa cu nan por ta trankilo y sigur cu e resultado y calidad di e testnan cu LabHOH ta diagnostica.
Pabien na e team di microbiologie di LabHOH pa e logro grandi aki!
