BonaireFeaturedInternacionalUncategorized

For di prome di yüli 2022 impuesto nobo di turista na Boneiru

Boneiru

Entrante 1 di yüli 2022 un impuesto di turista di $75 pa kada bishita na Boneiru ta na vigor pa kada no-residente di 13 aña bai ariba. Mucha te ku 12 aña ku no ta residente i tambe residentenan di e anterior Antia Hulandes ta paga $10 pa kada bishita na nos isla. Un eksonerashon ta konta pa studiantenan boneriano ku ta studia den eksterior. Por paga e impuesto di turista adelantá online òf sino na yegada. Pa pasaheronan di barkunan krusero e impuesto di turista ta kambia for di 1 di yanüari 2023. E ora ei e aktual asina yamá ‘headtax’ pa turistanan krusero ta bira un impuesto di turista di $10 pa persona. Ku entrada di e impuesto nobo di turista e turistanan ta kontribuí na desaroyo di Boneiru.

Den e reunion di Konseho Insular di Tuma Desishon di 12 di aprel 2022 a aprobá e konsepto di Ordenansa di Impuesto di Turista. Tambe a aprobá e amienda ku a keda entregá. Ku esaki e asina yamá ‘Entry Tax’ nobo ta bini na lugá di e aktual ‘room tax’ i ‘car tax’, kaminda te 1 di yüli 2022 ainda mester entregá impuesto di turista pa persona pa kada anochi i na momentu di hür un outo. Ku e sistema aktual un turista ku ta hospedá 9 dia i huntu ku un partner ta hür un outo, ta paga mas òf ménos US$ 67 na impuesto di turista i impuesto di hür di outo. Implementashon di e impuesto di turista ta kuadra ku e vishon di Kolegio Ehekutivo pa posishoná Boneiru komo un destinashon ku kualitativamente ta di balor haltu pa turista. Asina e responsabilidat pa pagamentu di impuesto di turista ta skùif for di e proveedornan di akomodashon i ta bai pa personanan no-residente. Pa pasaheronan krusero ku ta bishitá nos isla e kompania di barku ta entregá e impuesto di turista na nos isla.

Segun ekspektativa,ku e orenansa  nobo entrada pa nos isla ta oumentá ku mas di 6 mion dòler. ‘E entrada ta bai prinsipalmente pa mehorashon di kalidat i sostenibilidat di turismo na Boneiru. Den esaki nos ta enfoká riba entre otro programanan di treinen, aktividatnan kultural i outosufisiensia di habitantenan di Boneiru. Pa hopi aña kaba ta papiando tokante implementashon di e impuesto akí i e paso akí lo no tabata posibel sin un gobièrnu stabil ku un vishon konkreto i eksplísito pa futuro di Boneiru’, segun diputado Hennyson Thielman. ‘Ku esaki nos a pone un paso mas den direkshon di un kontribushon mas proporshonal entre habitantenan di Boneiru i nos bishitantenan pa uso di espasionan públiko i desaroyo di Boneiru.’

Tambe for di sektor turístiko nan ta reakshoná positivamente riba e kambio akí. ‘Ya pa mas ku 20 aña sektor turístiko ta pidi pa un kambio den e sistema di kobra impuesto, pa motibu ku den e sistema aktual kobramentu i entrega di e impuesto  ta laga di deseá. Vários biaha intentonan pa kambia e ordenansa bieu a kaba na nada, pero awor porfin a bini kambio den esei’, segun deklarashon di direktor di BONHATA Veroesjka de Windt.

Related posts

Ex minister di Deporte Ramon Lee: Si no tin amor pa mantene deporte tur cos lo kibra rond di dje

EA News Author

Sekretario di Estado Raymond Knops lo bishitá Boneiru, Aruba i Sint Maarten

EA News Author

Mientras cu droga a keda destrui Investigacion ta continua y inespera detencionnan por cay tanto na Hulanda y Bonaire

EA News Author

Leave a Comment

Whatsapp Message