Kuerpo Polisial Hulanda Karibense (KPCN) ta yama bon biní na Frank van der Lende komo e Hefe nobo di Polis Básiko (BPZ). Van der Lende ta bini di Cuerpo Policial Aruba (KPA) i e ta trese mas ku trinta aña di eksperensia den polis, di kua e parti mas grandi tabata den e parti karibense di Reino Hulandes.
Van der Lende a kuminsá su karera na 1992 na e skol di polis na Heerlen. Despues di su estudio, el a traha na Limburg-Zuid, prinsipalmente na Maastricht. Na 1997, via di Ministerio di Asuntunan Interno i Relashonnan di Reino (BZK), el a haña e oportunidat pa traha (uitgezonden) na Aruba. Loke a kuminsá komo un aventura temporal a krese bira un laso fuerte ku e isla i su komunidat.
Den Cuerpo Policial Aruba el a okupá vários funshon, bou di kua dosente senior di IBT, kordinadó di polis marítimo i komandante di sekshon den un unidat operashonal spesialisá. E tabata tambe miembro di SGBO i durante e último seis añanan el a kumpli ku e ròl di lider di krísis di e grupo hudisial den e struktura di desaster di gobièrnu di Aruba.
For di 13 di òktober, Van der Lende a kuminsá ofisialmente den su funshon nobo komo Hefe di Polis Básiko na KPCN.
“Mi a skohe konsientemente pa e stap aki,” Van der Lende ta bisa. “Mi ke usa mi eksperensia pa duna sosten i inspirá e siguiente generashon di koleganan. Loke ta motivá mi ta traha riba un kultura di konfiansa, kolaborashon i orguyo; un ambiente di trabou den kua tur hende ta sinti nan mes skuchá, apresiá i enbolbí.”
KPCN ta gradisí sr. Edwin van der Giessen pa su añanan largu di dedikashon komo Hefe di Polis Básiko. E ta keda aktivo den e kuerpo i lo bai enfoká riba fortifikashon di preparashon di estudionan. Esaki ta un pilá importante den e desaroyo adishonal di e kuerpo.
KPCN ta desea Van der Lende hopi éksito den su funshon nobo