FeaturedSocialLocal

Fundacion Telefon pa Hubentud ta cla pa un otro aña escolar

P4 Best Dad Ever

Un otro aña escolar a cuminsa y manera ta conoci pa algun aña caba, Fundacion Telefon pa Hubentud ta ofrece diferente charla di diferente topico na scolnan di Aruba. Pa e aña escolar 2023-2024, e team di Telefon pa Hubentud cu ta consisti di e director y dos trahado social, ta bon prepara y ta cla pa brinda e charlanan aki na diferente scolnan. E team di E Arubiano News a tuma contacto recientemente cu Fundacion Telefon pa Hubentud pa elabora un tiki mas tocante e charlanan y cursonan cu nan ta ofrece nos comunidad.

E aña aki, Fundacion Telefon pa Hubentud ta cumpli 24 aña di existencia riba nos isla chikito. Un Fundacion cu no ta desconoci den wowo di nos comunidad, Telefon pa Hubentud ta un forma mas facil unda hobennan por busca asistencia y guia na momentonan particular di nan bida unda nan por ta experenciando problema. E acceso di por yama 131 gratis, email of chat cu un persona ora cu un hoben tin mester di un hende pa papia cu ne, ta di importancia pa e bienestar y crecemento di e hoben. Basa riba informacion acumula, specificamente for di e Liña di Ayudo pa Hubentud di Hulanda, cu ya tawata existi pa mas di 20 aña caba y e Liña di Ayudo Corsou, cu tambe tawata existi caba na e momento ey, Fundacion Telefon pa Hubentud Aruba a dicidi di cuminsa cu e experimento di inclui hoben adulto (teenagers) den e grupo di mentor boluntario. Un experimento cu a resulta exitoso. Dependiendo di e contenido di e conservacion, e servicio di Telefon pa Hubentud por tin e siguiente funcionnan:
– Prevencion primario: preveni problema dunando sosten na e persona cu a yama
– Prevencion secundario: reconoce un problema menasante y sostene e persona cu a yama pa yuda haya un solucion.
– Prevencion di tercer: preveni cu e persona cu ta yama ta sigui experiencia resultado negativo di un problema. Hopi biaha esaki por resulta den un referencia na un ayudo mas specialisa.

Charlanan na scol
Manera ta conoci, e personal di Telefon pa Hubentud ta bishita scolnan rond Aruba pa duna presentacion tocante e trabou di Telefon pa Hubentud pero tambe ta ricibi peticion di scolnan pa organisa tayer, lectura y ta traha riba proyectonan cu topiconan manera termento, divorcio, sexualidad y dependiendo di e necesidad di cada grupo, ta ahusta e tayernan y charlanan pa brinda un asistencia completo. Nos a combersa cu Kimberly de Cuba, Trahado Social na Telefon pa Hubentud pa combersa un tiki mas tocante e tayernan y charlanan cu ta wordo duna. Segun Kimberly ta splica E Arubiano News, Telefon pa Hubentud ta cubri un total di 16 diferente topico, tur e topiconan aki por wordo ahusta segun e grupo, edad y interes di e scolnan mes.

E prome proyecto cu Telefon pa Hubentud a enfoca riba dje ta e proyecto pa e topico di Termento. Termento/ Bullying ta un topico cu te ainda, ta ricibi hopi peticion y sigur ta un topico cu hopi mucha y hoben tin mester di guia cu ne. E interesante di e topico di termento ta cu e no ta un topico pa solamente mucha y hoben, pero e informacion cu Telefon pa Hubentud ta comparti, por wordo adapta cuminsando for di e edad di 4 aña te cu adulto. Kimberly a splica tambe cu hopi biaha e topiconan cu nan ta cubri ta conecta cu otro, por ehempel e topico Derecho di Mucha, Norma y Balor, Termento. E topico di Derecho di Mucha ta wordo brinda den dos forma; tin e parti di charla unda cu e charlanan por dura entre 45-60 min y e parti di proyecto cu ta varia pa cada proyecto, y por dura algun siman of algun luna.

Un otro topico cu Kimberly a menciona ta e topico di Norma y Balor. Mester añadi cu Telefon pa Hubentud ta recomenda scolnan pa duna e topico aki na e cuminsamento di e aña escolar. Algun scol ta scoge pa haci un pakete di diferente charla y den casonan asina, Telefon pa Hubentud ta duna su recomendacionnan pa comienso y fin di aña escolar. Pa yuda forma un fundeshi pa e comienso di e aña escolar, e charla Norma y Balor ta uno cu por yuda e hobennan cu un aña escolar exitoso. Kimberly a splica tambe cu mesun cos cu nan ta recomenda un topico pa cuminsamento di aña, nan tin un recomendacion pa e fin di aña tambe. Por ehempel na final di vijfde klas of comienso di zesde klas ta recomenda scolnan pa haci e charla Ken mi ta? E charla aki ta duna maestronan un miho bista riba su alumnonan, e ta un charla cu ta yuda e hobennan refleha hopi riba nan mes y con nan ta wordo mira door di nan mesun coleganan di klas. Esaki ta duna e maestro tempo amplio pa traha cu e alumnonan durante e aña escolar, den caso cu e alumno por tin e necesidad di un tiki mas guia. Na fin di zesde klas, Telefon pa Hubentud ta recomenda pa hasi e charla di Peer Pressure pa motibo cu e hobennan lo sigui pa scolnan secundario unda nan por enfrenta Peer Pressure y e charla aki ta duna nan cu e hermentnan necesario pa por surpasa e desafio.

Kimberly a sigui splica cu un topico cu tin un interes ta creciendo ta e topico di Cyberworld. Esaki ta un charla cu hopi biaha ta wordo duna den zesde klas of na scolnan secundario pa motibo cu por bai diferente direccion cu ne, por ehempel sexting unda e hobennan ta haya informacion con pa hasi uzo di internet den un forma corecto pero tambe pa trece atencion na e hecho cu hopi hende ta manda nudes y ta siña con pa anda cu esaki. Den e mundo online y den gaming tin hopi cyberbullying y esaki ta e otro direccion cu por tuma cu e charla di Cyberworld. Cyberbullying ta algo relativamente nobo y nos ta tende mas y mas di dje ultimo tempo.

Un topico cu a bira mas frecuente na Aruba ta e topico di Motivacion unda un docente tambe por ricibi un tiki ayudo pa e motivacion di e alumnonan pa sigui traha duro durante e aña escolar. Un topico cu tur aña ta wordo pidi door di scolnan ta e topico di Comunicacion. Scolnan ta opta pa hasi un anochi informativo unda e adultonan y mayornan por haya un tiki mas guia na momento cu nan yiu ta cuminsa bira adolescente. Involucrando e mayornan ta un forma pa yuda e alumnonan caba nan aña escolar exitosamente. Aunke nos situacion actual a cambia hopi compara cu 2020, Kimberly a conta nos cu tin e topico di Nos normal nobo. Un topico cu ya ta wordo pidi menos, pero cu si a hasi su efecto na momento cu nos alumnonan mester a adapta na scol online y shelter in place.

Mirando cu e tema di igualdad a cuminsa bira mas y mas comun na Aruba, nos a puntra Kimberly si tin charlanan cu ta enfoca riba igualdad y discriminacion. Kimberly ta splica cu esaki ta un topico cu nan ta amplia hopi riba dje pa motibo cu hopi persona cu tin diferente nacionalidad ta enfrenta hopi discriminacion. Na Aruba, e la bira hopi comun pa yama un minimarket ‘chines’ sin realisa cu esaki ta un forma di discriminacion, esaki ta topiconan cu Telefon pa Hubentud tambe ta cubri. E yamada ta bay na tur maestra, maestro y cabesantenan di scol, pa tuma contacto cu Telefon pa Hubentud y traha bo cita, forma bo pakete pa e charlanan di Telefon pa Hubentud.

Den bo Bario
Durante e temporada di vakantie grandi, e team di Fundacion Telefon pa Hubentud ta kana den varios bario pa brinda sosten y informacion na mayornan y hobennan. E meta di e proyecto aki ta, pa por scucha for di cada persona kon e ta pa biba den e bario cu nan ta biba y kico ta e retonan cu nan ta enfrenta.

Best Dad Ever
E proyecto di Best Dad Ever ta un proyecto cu a cuminsa na 2017, na momento cu un studiante cu a haci su eind-stage na Telefon pa Hubentud. Como parti di e stage, e mester a haci un estudio pa e interes di parti di e hende homber y si tin interes pa e tin un rol den e bida di su yiu. A base di e resultadonan di e estudio aki, a nace e proyecto Best Dad Ever. Na 2019 a haci e pilot cu nuebe persona y por a ripara mesora cu un grupo di nuebe persona ta mucho hopi. Pa splica un tiki mas, durante e 10 sesionnan di e curso di Best Dad Ever tin algun momento cu e participantenan ta encontra nan mes cu traumanan cu nan no a verwerk. Durante e sesionnan aki, nan ta haya e oportunidad pa papia tocante e traumanan aki y pa e motibo aki ta mantene e gruponan chikito, maximo 7 participante. Dependiendo di e topico di e anochi, Telefon pa Hubentud ta invita un psycholoog of partera pa ta presente durante e curso. Best Dad Ever ta consisti di diez sesion reparti den dos sesion pa siman. E siguiente curso di Best Dad Ever lo cuminsa dia 3 di october 2023 y lo ta e ultimo curso pa e aña aki. Actualmente tin dos cupo mas disponibel, pues por tuma contacto cu Telefon pa Hubentud pa sigura un luga den e curso aki.

Luna di aniversario
Banda di celebra su aniversario riba 20 di november, esaki ta e fecha oficial pa Dia Internacional di Derecho di Mucha. Cu esaki den mente tur aña, Telefon pa Hubentud ta presenta of lansa un proyecto nobo cu e topico cu ta wordo selecta a base di e yamadanan telefonico, e-mail y convocacionnan via chat. Pues, keda pendiente pa e proyecto di e aña aki!

Pa mas informacion, pa haci un cita of pa planea charlanan na scol, por tuma contacto cu e team di Fundacion Telefon pa Hubentud na 588-4011 of manda nan un email na telhubentud@gmail.com

P4 Anuncio Docente

Related posts

Minister mr. Ady Thijsen: ‘Hulanda mester tin mas comprension y sosten pa Aruba’

EA News Author

Tourism Corporation Bonaire a presentá su Plan di Akshon 2024

EA News Author

Tremendo acohida durante un anochi interesante Hospital cu session di informacion di Coronavirus pa tur dunado di cuido

EA News Author

1 comment

Fundacion Telefon pa Hubentud ta cla pa un otro aña escolar - Notisia 365 September 1, 2023 at 12:23 pm

[…] Source link […]

Reply

Leave a Comment

Whatsapp Message