Riba 24 di yanüari último, Ministerio di Enseñansa, Siensia, Kultura i Deporte (ESKD) den koperashon ku UNESCO Kòrsou a selebrá Dia di Edukashon huntu ku maestro i alumnonan di Skol di fundeshi Emmy Berthold. Esaki tabata e di tres Dia Internashonal di Edukashon ku e tema: Rekuperá i revitalisá edukashon pa e generashon di COVID-19.
Asemblea General di Nashonnan Uní a proklamá 24 di yanüari komo Dia Internashonal di Edukashon pa selebrá e ròl ku edukashon tin pa krea pas i desaroyo rònt mundu. Nashonnan Uní ta konsiderá edukashon di ta un derecho humano i responsabilidat públiko. Na Kòrsou tambe COVID-19 tabatin su impakto riba enseñansa. Den e lunanan tras di lomba, no tabata fásil pa alumno sigui lès den un forma adaptá. Bai skol un dia si, e otro dia no, ta algu ku un alumno no a kustumbrá di hasi. Siña tras di un pantaya di kompüter òf laptop, sierto mucha asta for di un telefòn, no ta kosnan ku e alumnonan tabata prepará p’e.
Riba Dia Internashon di Edukashon, Ministerio ESKD a duna atenshon na e tema ‘Rekuperá i revitalisá edukashon pa e generashon di COVID-19‘ ku un enkuentro festivo na skol Emmy Berthold, ku riba 8 di yanüari último a hasi 59 aña di eksistensia. Riba e dia akí tambe a lansa aktividatnan di selebrashon den kuadro di 10 aña miembresia di Kòrsou komo miembro asosiá na UNESCO. Na òktober 25 ta rekordá e dia akí. E promé aktividat a kuminsá ku Emmy Bertholdschool i asina lo sigui mas durante di aña.
Minister di ESKD sr. Steven Croes, a deseá tur personal ku ta eduká nos mucha i hóbennan un felis dia i alabes a yama nan danki pa nan aporte ku ta di gran balor pa nos komunidat. Semper sigui traha na bienestar di nos komunidat, siñando nos muchanan for di chikí (teach them young) pa asina na grandi nan ta siudadanonan ku ta logra nan metanan i sigui karga nos komunidat.
