Lider di fraccion di PPA, Eduard Pieters, a lansa criticanan fuerte contra Minister di Enseñansa, Gerlien Croes, relaciona cu un destaho publico pa material escolar na Hulandes y Papiamento. Segun Pieters, tin un falta di transparencia precupante den e forma con a desvia di e proceduranan regular di contabilidad publico.
Durante un reunion recien den Parlamento, e maneho di fondonan publico pa cu produccion di material educativo a bira e punto principal di debate. Pieters, kende tin un trayectoria largo den e sector di enseñansa, a cuestiona e hecho cu a scoge pa un ruta cu no ta cuadra cu e reglanan standard di destaho.
Duda riba ausencia di proveedornan
Den su defensa, Minister Croes a indica cu a opta pa e procedura aki pasobra no tin suficiente compania of proveedornan (“aanbieders”) riba mercado cu por a presenta un oferta pa produci material specialisa na Hulandes y Papiamento.
Maske Pieters a admiti cu e sa cu e materia aki ta un specialismo caminda no tin hopi oferta, el a subraya cu e argumento di e mandatario no ta suficiente. Segun e lider di PPA, e Minister tin e obligacion legal y moral di presenta prueba concreto cu efectivamente a busca otro alternativa y cu no tabatin mas proveedor disponibel. “Esaki ta loke no a tuma luga,” Pieters a enfatisa, indicando cu e falta di documentacion ta lanta duda riba e integridad di e proceso.
Maneho via social media vs. Parlamento un sistema di inmadures di Minister Gerlien Croes
Un otro punto di irritacion pa e fraccion di PPA ta e forma di comunicacion di e mandatario. Pieters a critica cu Minister Croes no ta bin Parlamento cu e frecuencia desea pa duna cuenta di su actonan of pa contesta pregunta di e diferente fraccionnan formalmente.
Enbes di scoge pa e via institucional, e orador a señala cu e Minister ta opta pa uza plataforman digital manera Facebook pa expresa su opinionnan of “tira cos”. Segun Pieters, esaki no ta e manera profesional ni corecto pa un mandatario actua, specialmente ora ta trata di decisionnan cu ta involucra fondo di pueblo y e futuro educativo di e pais.
Precupacion pa enseñansa
E disputa aki ta pone focus riba e produccion di material escolar, un area critico pa e desaroyo di e studiantenan na Aruba. Pa PPA, e transparencia den con ta gasta e placa destina pa e materialnan aki mester ta ariba tur cuestion, pa garantisa cu e miho inversion ta wordo haci pa e scolnan sin skip e controlnan democratico necesario.