E forma cu gobierno ta maneha e mercado informal y e cobranza di belasting na Aruba ta crea un inmenso ineficiencia y desincentivo pa e comerciante legal. Den e ultimo declaracion aki, a pone un enfasis fuerte riba e falta di boluntad pa haci handhaving den un isla chikito y riba e manera un poco “estupido” cu e sistema ta premia e mal pagado mientras e ta castiga esun cu ta cumpli.
Falta di handhaving den un isla di 20 kilometro
Presidente di Comerciantenan UNI CUA Frabs Ponson ta cuestiona severamente con na un pais di apenas 20 kilometro di largura no por tin un control y handhaving adecuado. “Si gobierno por manda cuater auto di Veiligheidsdienst Aruba anochi pa core 8 ora rond den barionan, con bo por bisami cu nos no por haya e negoshinan ilegal aki?
Enbes di busca e informalnan, e custumber di e gobiernonan ta pa semper bay busca e comerciantenan grandi y formal pasobra nan ta facil pa controla. Maske 90% di e mercado ta consisti di comerciantenan chikito, ta keda sin actua contra e sector informal, loke ta pone tur e otro negoshinan legal zwak den e competencia.
Un sistema fiscal cu ta premia e mal pagado
Un di e puntonan mas critico presenta ta e forma cu Belastingdienst ta negosha cu esnan cu no ta cumpli. Actualmente, e sistema ta faborece esun cu no ta paga:
E mal pagador: Ta keda sin paga belasting pa 5 aña y despues ta bay negosha un miho deal cu gobierno, unda hopi biaha ta dun’e un descuento di 30% pa 40% si e paga den un solo biaha (one shot).
E bon pagado: Esun cu ta cumpli a tempo tur aña no ta ricibi niun tipo di beneficio of descuento.
A haci un yamada pa cambia e mentalidad aki completamente: duna descuento of beneficio na e comerciante cu ta paga su belasting na tempo e aña aki mes, pa asina motiva e mal pagado pa drenta den e grupo legal.
E absurdo di e permisonan (vergunning)
E situacion aki ta ripiti su mes den e concesion di permisonan na DOW of departamentonan gubernamental. Un comerciante cu kier haci cos legalmente y ta pidi un vergunning pa opera riba caya, hopi biaha ta wordo nenga. Pero pasobra el a pidi e permiso, e ta keda den e sistema y autoridadnan ta bin kit’e of detene.
Mientrastanto, e hendenan cu ta opera tur dia riba caya completamente ilegal no ta wordo toca pa e simpel rason cu “nan no a pidi permiso”. Esaki ta crea un paradigma castigando pa esun cu kier haci cos pa via legal.
Menos ley nobo, mas handhaving
Como conclusion, e mensahe pa e liderazgo politico tabata directo: stop di kier bin cu leynan nobo simplemente pa tur minister bisa cu el a haci algo den su 4 aña di mandato.
Si nos stop 4 aña largo, no bin cu ningun ley nobo yhustamente bay haci handhaving di loke tin caba, nos ta bay tin un miho Aruba,presidente di Comerciantenan UNI CUA Frans Ponson a declara