Durante ultimo simannan por a tuma nota di diferente bishita cu a tuma luga na varios departamento di husticia. Minister mr. drs. Arthur Dowers a enfoca recien na e parti pariba di nos isla. A pasa entre otro na Scol di Polis, Warda di Polis Savaneta, Operation Command Center como tambe na Korrectie Instituut Aruba (KIA).
Di e cuatro facilidadnan cu Minister Dowers a bishita, dos ta den deterioro total. Ta di lamenta cu mester constata cu tin hopi reto den e departamentonan di husticia, specialmente ora e gobierno anterior ta grita cu bos halto cu nan a laga un surplus.
Korrectie Instituut Aruba (KIA), e prizon di Aruba, ta den situacion hopi complica y deplorabel cu ta aumenta e necesidad pa efectua un intervencion mas lihe posibel.
A haya oportunidad tambe pa papia cu diferente hende envolvi. Locual ta sinti cerca e trahadonan en todo caso ta cu e motivacion t’ey cerca varios di nan, pero e condicion cual nan ta traha bao nan ta pisa y ta pone un presion hopi grandi riba nan, tanto fisicamente, memtalmente como riba nan estado di salud.
Minister a indica cu gobierno den e situacion aki tin un responsabilidad hopi grandi pa atende cu ne. Banda di esaki tin reto grandi pa locual ta e edificio y su structura, como tambe e parti organisatorio cu tambe lo mester bay interveni aden y mira con lo por fortifica e maneho den e organisacion.
Tin cu bay streamline diferente proceso cu ta tuma luga den e organisacion y garantisa cu e por funciona mas eficiente y cu tur procedura cu mester hiba, ta cana corecto.
