Komo parti di esfuerzonan di buska sosten mas amplio, Sra Joseline Thielman di Muhernan Fuerte Bonaire lo ta representando Sr James Finies i e Kaso di Bonaire na e Foro Internashonal di COPPPAL ku ta tuma lugá na Aruba i ku ta ser organisa pa Movimiento Electoral di Pueblo (MEP). Sra Thielman orguyosamente lo representá e resistensia i dignidat di pueblo Boneriano den e konferensia Karibeño i Latino-Amerikano aki.
Kontinuando ku e lucha I esfuerzonan persistente pa sigui krese aliansa internashonal pa defende derecho di Bonaire di outodeterminashon, James Finies, lider di Pueblo Progresivo I Uni i fundado di Bonaire Human Rights Organization, ta sigui fortifika i aumenta e inisiativanan di lobby den Latinoamérica.
Aktualmente, Sr Finies ta na Ginebra, Suiza, partisipando den e 78 seshon di Komishon di Nashon Uní pa Derechonan Ekonomiko, Sosial i Kultural (CESCR), kaminda Hulanda ta wordu kuestiona i tin e obligashon pa informá tokante kumplimiento ku derechonan humano, desaroyo i bienestar di pueblo di Bonaire. Su presensia ta pone énfasis riba e nesesidad urgente pa supervishón internashonal tokante e situashon di derecho humano na Boneiru i Karibe Hulandés.
Na aña 2023, COPPPAL, Konferensia Permanente di Partido Polítiko di Latinoamérica i Karibe, den kolaborashon ku Bonaire Human Rights Organization, a habri un ofisina na Bonaire. Esaki ta demonstrá e kompromiso di COPPPAL pa apoyá e trajektoria di Bonaire pa wordupone bek riba e lista di Tèrritorionan Sin Propio Gobernahson di Nashonan Uni. Tambe ta un paso importante pa logra rekonesimentu i solidaridat regional den e lucha di Bonaire pa deskolonisashon i derechonan humano.