Sin ningun splicacion Minister di Educacion Gerlien Croes a dicidi di “doek op” un departamento cu a bini pa protege e yiunan y cu mamam tin e confiansa pa laga nan yiunan atras cu mester traha pa gana placa, cu awo ta na peligro. E departamento lanta pa guia y controla crechenan di Aruba no ta den funcion mas. Tur danki na actuacion y decision di Minister Gerlien Croes, kende cu e acto aki a demostra cu e no ta preocupa cu e muchanan (Baby) chikito di Aruba ta bon protegi mientras cu nan mayornan ta bay traha.
E ley di Kinderopvang cu a pasa dos aña pasa y ratifica pa Minister di Husticia a percura pa e Departamento di Mucha y Hoben a wordo lanta.
Awo e mandatario a dicidi, probablemente pa capricho pa motibo cu no ta un proyecto di su persona of su gobierno y ta dicidi di pone un banda. Practicamente por bisa cu el a “doek op” e departamento, pasobra a manda e personal, segun por a compronde tur, pa nan departamento bek. Y esaki ta sosode despues cu sacrificio, pasobra no tabatin mucho recurso, a lanta e departamento pa proteccion di tur e muchanan di Aruba. Placa uza den e proyecto aki, awo ta placa perdi, kapitaalvernietiging cu ta un palabra cu politiconan ta gusta uza.
E motibo cu a bini cu un ley di Kinderopvang ta debi na diferente caso di negligencia cu tabata tuma luga y unda mas cu un menor a perde nan bida debi na esey of debi na falta di conocemento den cuido di muchanan. No por laga e cuido di baby of mucha den man di cualkier persona. Y no ta papia di cuido un menor pero basta menor hunto cu cada creche ta ricibi diariamente.
E ley di Kinderopvang ta regula e operacion di e crechenan na Aruba, kico tur ta e condicionnan pa lanta un crece y obligacionnan cu nan mester cumpli cu nan, manera estudio y curso cu esnan cu ta traha na un creche mester tin. Y Departamento di Mucha y Hoben mester percura, vigila cu tur e crechenan di Aruba ta cumplI cu tur rekisito, no solamente di personal pero tambe cu e facilidad ta bon ekipa.
Pues e departamento aki a bini pa evita cu crechenan ta lanta manera paddestoel y sin e personal capacita pa cuida muchanan, entre otro tin biaha muchanan special of cu mester di extra pasenshi, y unda no por tin casonan di maltrato. Tur cu e meta pa tin un miho cuido.
E echo cu e anterior minister anterior no a percura pa regla e posicion huridico di e team trahando eynan, ta berdad. Pero no ta motibo pa kita e control. Miho cos lo tabata pa regla e situacion en bes di dal atras pa un situacion unda cu no tin ningun tipo di control riba e crechenan. Awo e maneho di e minister ta dal un paso atras, unda cu tin crechenan operando sin control. Poniendo bida di e muchanan na peligro.
E pregunta ta kico ta e intencion di e actuacion aki, cu ta parce uno yena di malicia. E lo kier djis elimina e departamento pa despues bini cu algo similar y bisa cu ta un logro di dje? Si t’asina e por a simplemente restructura e departamento pa no laga un situacion al wild wild west.
Mester bisa cu ta hopi placa ta bay perdi pagando pa huur unda cu e departamento no ta opera mas. Placa perdi di pueblo, y malgasta. Esaki ta algo cu mester cuestiona pasobra ta un abuso di poder tras di un cara bunita y angelical cu ta aparece dilanti pueblo, pero e maneho unda cu ta kita control di crechenan y poniendo bida di muchanan na peligro.
