E hoben Arubiano, Joshua van der Biezen, ta den pleno preparacion y competiendo fuertemente den e prestigioso certamen di modelahe masculino ‘Manhunt Netherlands 2026’. E plataforma aki no solamente ta busca e miho ‘looks’, sino tambe hombernan cu pasion, vision y un mision cla den e mundo di moda y modelahe. E ganado maximo lo tin e honor di representa Hulanda na e certamen internacional ‘Manhunt Male Supermodel’ na Vietnam pa e aña 2027.
Manhunt Netherlands ta conoci como un male modeling pageant di alto nivel unda e participantenan mester demostra nan talento, disciplina y personalidad den diferente ronda exigente, incluyendo catwalk, pasarela den paña formal y trahe di baño (zwembroek). Na mesun evento lo corona tambe e titulonan di “Gentleman of the Netherlands” y “Mister Junior Netherlands”.
Un trayecto yen di reto y crecemento personal
Desde e inicio oficial di e competencianan dia 12 di april ultimo, e participantenan a wordo pusha den un “boto cu olanan grandi”, enfrentando un serie di ‘challenges’ exigente. Joshua a bin ta participa den diferente fotoshoot profesional den exterior, banda di esaki el a sigui charlanan educativo riba kico e ta nifica pa ta un berdadero ehempel y ‘role model’ pa otronan.
E retonan no a keda solamente den persona; e competencia tin un parti digital hopi fuerte unda Joshua mester a crea contenido pa e reto di “Day in a life” y un “Media Challenge”. Como parti di su strategia final pa e reto di media aki, e hoben talentoso a dicidi di acerca e plataforma periodistico local pa comparti su historia cu Aruba.
Mas cu un cara bunita: Ambicion, caracter y disciplina
Pa Joshua van der Biezen, e decision di inscribi den e certamen aki tabata un meta pa surpasa su mesun limitenan.
E ta un oportunidad unico pa challenge mi mes tanto fisicamente como mentalmente, pa asina mi por crece den mi propio siguridad, presentacion y disciplina,” Joshua a duna di conoce.
Joshua, kende ya tin su mesun plataforma digital enfoca riba fitness, fashion y motivacion, ta mira e certamen aki como e drempel perfecto pa hiba su mensahe na un nivel nacional y, si tur cos bay bon, na un stage internacional. Pa e hoben Arubiano, Manhunt Netherlands ta e escenario ideal pa demostra cu e modelahe masculino di awendia ta para pa ambicion, caracter y e balornan cu un persona ta representa den bida diario.
Pa sigui e trayecto di Joshua:
Comunidad por apoya y sigui e paso di nos orguyo local via su retanan oficial y di e
organisacion:
• Website Oficial: Manhunt Netherlands
• Instagram di e Organisacion: @manhuntnetherlands / @manhuntnlorg
• Instagram Personal: @orphy.biezn
• Facebook: Josh.Biezn
• TikTok: @orphy.biezn
