BonaireFeatured

Kolegio ehekutivo ta proponé fleksibilisashon di visitor entry tax

Kolegio Ehekutivo Ta Propone Fleksibilisashon Di Visitor Entry

Entidat Públiko Boneiru komo kontinuashon riba e ordenansa di impuesto nobo di turista, e asina yamá ‘Visitor Entry Tax’, a entregá un proposishon di kambio na Konseho Insular. Ku entrega di e proposishon akí Entidat Públiko Boneiru ta duna oido na e promesa pa dentro di 6 luna evaluá e Visitor Entry Tax ku a drenta na vigor dia 1 di yüli 2022.

E Visitor Entry Tax a remplasá e impuestonan ku anteriormente tabata konosí komo ‘roomtax’ i ‘rental car tax’. Tabata kobra e anterior impuestonan akí via e akomodashonnan i via e kompanianan di hür outo, i e Visitor Entry Tax ta kobra mesora serka e bishitantenan. E Visitor Entry Tax o sea e impuesto di turista ta aplikabel pa tur no-residente di Boneiru, ku eksepshon di studiantenan boneriano ku ta studia den eksterior i ku ta biaha pa Boneiru. Durante e evaluashon a analisá e gruponan pa kende e impuesto ta konta i tambe e tempu di balides i altura di e tarifa.

‘E proposishon ku Kolegio Ehekutivo a entregá na Konseho Insular ta referí na algun punto ku a bini dilanti durante e evaluashon’, segun diputado Thielman. ‘Tuma por ehèmpel e tempu ku e Visitor Entry Tax ta keda bálido pa no stroba biahamentu di isla pa isla i bishita serka famia na e otro islanan. Òf e deseo pa fleksibilisashon pa bonerianonan ku ta biba den eksterior. A wak bèk tambe riba un implementashon ku a kana eksitosamente, no opstante e periodo sumamente kòrtiku entre stipulashon i entrada na vigor. Tambe t’asina ku implementashon di e impuesto a sòru ku e entrada, ku awor akí ta hopi mas haltu ku promé, ta resultá direktamente riba kuenta di Entidat Públiko Boneiru.’

A yega na e puntonan di mehorashon ku a inkluí den e konseho na Konseho Insular den deliberashon ku Bonhata, TCB i e departamentonan di Finansa, di Asuntunan Hurídiko i General (JAZ) i di Asuntunan Ekonómiko i a pidi konseho serka Servisio di Imigrashon i Naturalisashon (IND) i Registro Sivil. E konseho a kondusí na un proposishon pa kambio pa mehorá e ordenansa riba algun parti. A dediká hopi atenshon tambe na kon ehekutabel e proposishon ta.

Resumiendo e proposishon di Kolegio Ehekutivo ta pa hasi e Visitor Entry Tax igual pa tur hende ku segun nan pasport a nase na un di e islanan ku ta parti di Reino, hasi e tempu ku e ta keda bálido mas largu pa bishitante turístiko i traha un areglo di eksepshon pa biahe médiko ku un referensia di ZVK.

Segun diputado Thielman ku e proposishon akí mas tantu posibel Entidat Públiko Boneiru ta honra e preguntanan i remarkenan ku nan a tende durante e evaluashon.   

Related posts

Premier Wever-Croes a reuni cu Gemeente Venray pa explora areanan di cooperacion

EA News Author

Ku nombramentu di Mark Volmerink komo hefe nobo di departamento di finansa entidat públiko Boneiru ta trese ekspertisio finansiero lokal den e organisashon

EA News Author

Un otro edishon di menstruashon solidiario pa yuda kombatí i konsientisá riba pobresa menstrual

EA News Author

Leave a Comment

Whatsapp Message