Djárason 26 di febrüari, Kuerpo Polisial Hulanda Karibense a tene diferente kòntròl dirigí riba tantu seguridat di tráfiko komo enforsamentu di e Lei di Opio BES na Rincon.
Kòntròl di tráfiko riba Bulevar Miguel Pourier:
Den oranan lat di atardi a tene un kòntròl di tráfiko ku e meta pa garantisá seguridat di tráfiko na Rincon. A kontrolá un total di 53 vehíkulo di kua 15 shofùr a haña un but pa diferente infrakshon di tráfiko.
E butnan tabata pa lo siguiente:
- 1x pa manehá sin hèlm bistí
- 1x pa no transportá mucha den stul pa mucha
- 1x pa manehá sin plachi di number dilanti
- 1x pa manehá sin un spil den banda
- 1x pa manehá sin bandera obligatorio 40×40 pegá na karga ku ta sali afó
- 1x pa manehá ku un winshil dañá
- 4x pa manehá sin un reibeweis bálido
- 5x pa manehá sin seguro bálido
- 8x pa manehá sin faha di seguridat bistí
KPCN ta hala atenshon di un i tur pa kumpli ku e reglanan di Lei di Tráfiko. Ku esaki bo tambe ta kontribuí na un tráfiko seif i sigur riba e isla. E periodo benidero lo bai tene kòntròl regularmente, kaminda lo aktua ku man duru na momentu ku bo no tin bo dokumentunan na òrdu i tambe si bo no ta kumpli ku reglanan di tráfiko.
Bo no ta kumpli ku reglanan? Bo por haña un but. E suma di un but pa e violashonnan menshoná ta varia entre $30 te ku $225.
Kòntròl riba violashon di Lei di Opio BES:
Mas den oranan di anochi, a tene un kòntròl na un establesimentu di hóreka na altura di Plaza Commerce, tambe riba Bulevar Miguel Pourier. A base di vários informashon, e área aki ta konosí pa polis komo un lokalidat ku probablemente regularmente ta usa i bende supstansianan narkótiko, loke ta kousa molèster pa habitantenan den bisendario.
A kontrolá tur ku tabata presente riba violashon di Lei di Opio BES. Durante di e kòntròl, e agentenan a topa ku un kuchú den un tas.
Ku e akshonnan aki, KPCN ta komprometé na un Rincon mas seif i e enforsamentu di Lei den e área lo sigui.
Bo a mira algu sospechoso? Yama 717 8000 òf e liña di tep anónimo 9310.
