Resientemente, Ofisina di Turismo di Kòrsou (CTB) huntu ku Blue Bay Curaçao Golf & Beach Resort i Blue Bay golf course a partisipá na e feria di gòlf di mas importante na Hulanda kual ta Holland Golf Show. E evento a tuma lugá na Jaarbeurs na Utrecht, Hulanda i a konta ku partisipashon di aproksimadamente 4000 bishitante. Meta di Kòrsou su partisipashon tabata pa ofresé hungadónan di gòlf tantu profeshonal komo amatùr i tambe amantenan di e deporte di gòlf informashon di Kòrsou komo destinashon turístiko i e posibilidatnan pa hospedahe i gòlf na Blue Bay Curaçao.
E stènt di Kòrsou a konta tambe ku presensia di e atleta profeshonal yu di Kòrsou Churandy Martina kual ta e kara di Blue Bay Curaçao. Tur ku a hasi uso di e posibilidat pa hasi nan reservashon mesora a risibí deskuento riba nan ticket ku TUI i nan akomodashon na Blue Bay Curaçao. Tambe nan a risibí un seshon di gòlf grátis na e kancha di gòlf na Blue Bay Curaçao i un pakete di material di promoshon di parti di CTB. Durante henter aña Kòrsou lo sigui partisipá na e diferente ferianan dirigí riba e deporte di gòlf pa asina sigui promové nos destinashon komo e destinashon ideal pa práktika e deporte di gòlf tambe.
