Na mei di e aña aki, Triángulo di Boneiru (Entidat Públiko Boneiru, Ministerio Públiko i Kuerpo Polisial Hulanda Karibense – KPCN) a yega na akuerdo riba regulashon, mantenshon di lei i informashon públiko bon kla tokante uso di ‘fatbike, e-bike’ i skuter eléktriko. A anunsiá ku despues di e promé mitar di aña, polis lo kontrolá aktivamente si ta kumpli ku reglanan.
Resientemente, Kuerpo Polisial Hulanda Karibense (KPCN) a haña un ‘rollerbank’ nobo. A kumpra un pa kada un di e tres islanan. Esun pa Boneiru a yega kaba; ta spera esunnan di Saba i Sint Eustatius pronto.
Kiko ta un ‘rollerbank’?
Ku e ‘rollerbank’, polis por kontrolá velosidat di bròmfits, skuter i baiskelnan eléktriko (manera fatbike). Dor di pone e vehíkulo riba e ‘rollerbank’, polis por midi di un forma konfiabel si e ta kumpli ku e leinan. E ‘rollerbank’ ta indiká outomátikamente ora un vehíkulo ta kore mas duru ku ta permití.
Kiko e lei ta bisa?
Tráfiko na Hulanda Karibense ta kai bou di e Ordenansa di Tráfiko di Boneiru, Saba i Sint Eustatius. E reglanan aki ta determiná, entre otro, kua vehíkulo ta permití, kiko ta e vèlosidat máksimo ku ta apliká i kiko obligashon di e shofùrnan ta.
Bròmfits i skuter
E vehíkulonan aki por kore un máksimo di 55 km pa ora. E shofùrnan mester tin por lo ménos 16 aña di edat, un reibeweis bálido (un pèrmit di bròmfits pa esnan entre 16-17 aña, reibeweis B for di 18 aña) i bisti hèlm. Tambe e vehíkulo mester ta segurá i tin un plachi di number.
Baiskel eléktriko ku yudansa di pedal (e-bike i fatbike)
Pa e-bike, e yudansa di pedal mester stòp na 25 km pa ora. Esaki ta nifiká ku bo por kore mas duru, pero solamente ku bo mes forsa.
Si e baiskel ta bai mas duru ku 30 km pa ora ku yudansa di pedal, òf si e baiskel tin un tròt (gashendel), e ora ei lei ta konsider’é un bròmfits.
Den e kaso aki, e mesun reglanan pa bròmfits ta konta: reibeweis, hèlm, plachi di number i seguro ta obligatorio.
Stèpnan eléktriko i otro vehíkulonan motorisá sin yudansa di pedal
Esakinan outomátikamente ta kai bou di e kategoria bròmfits. Aki tambe, e mesun reglanan i obligashonnan ta konta.
Vigilansia
Si resultá ku un vehíkulo no ta kumpli ku e reglanan, polis por aktua. Esaki por vária di un atvertensia òf un but, te na konfiskashon den kasonan grave. Ademas, lo kontrolá si e shofùr tin e dokumentunan korekto, manera reibeweis, plachi di number i seguro.
E uso di e ‘rollerbank’ ta un siguiente paso pa mehorá seguridat di tráfiko na Hulanda Karibense. KPCN ta hasi un yamada na tur usuario di tráfiko pa mantené nan mes na e reglanan di tráfiko i tene kuenta ku otro. Seguridat di tráfiko ta un responsabilidat kolektivo. Dor di manehá konsiente i sigui e reglanan, tantu abitantenan komo bishitantenan ta kontribuí na un tráfiko mas seif riba tur tres isla.