Den conferencia di prensa riba dialuna 18 september 2023, Minister President di Aruba (MinPres) a splica unda Aruba ta para awo cu e negociacion di e RAFt (Rijkswet Aruba Financieel toezicht) ya cu no a cumpli cu e deadline di 1 september.
Loke ta e mas remarcabel di e conferencia di prensa ta con facil Min Pres ta papia tocante sumanan grandi cu lo afecta tur ciudadano di nos isla. Min Pres ta splica cu e interes faborabel di 3.1% no ta riba mesa mas, pero cu awo e interes lo ta entre 5.1% y 6.5%, cu ta solamente un diferencia di Afl. 1 miyon. Na final Min Pres a coregi cu e diferencia ta alrededor di Afl. 10 miyon. Min Pres a agrega cu Aruba lo por carga e suma aki pero no a splica con Aruba por carga esaki. A solamente menciona cu e entradanan di Aruba ta bayendo hopi bon! Tin cu interpreta esaki cu entrada nan di Impuesto, cu ta gasto di pueblo, ta miho cu a premira? No ta miho pa baha Impuesto pa crea alivio pa comunidad?
E Afl. 30 miyon cu ATIA a calcula y skirbi riba dje ta si Gobierno lo a cumpli prome cu 1 september, pero esey no a pasa pues e interes a subi. Ta incorecto pa keda compara solamente awo 5 y 6% so, paso no a cumpli. Nos no tin cu lubida cu den pasado e interes tawata mas abou cu 3.1%. Incumplimento ta bay costa Aruba porlomenos Afl. 20 miyon extra na interes pa aña. Esaki ta un costo cu nos tur lo kier carga? Por a evita e gasto adicional aki cu awor lo mester cubri cu entrada di Impuesto. Den comercio bo lo yama esaki un “opportunity cost”, e costo extra cu mester wordo paga pa no haci uzo di algun oportunidad pa un motibo of otro.
Placa cu por a wordo husa pa baha nos prestamo nan, of mas importante inverti den drecha caya (infrastructura), enseñansa (nos juventud y futuro), of den seguridad di nos pais E areanan aki ta exactamente esunnan cu a wordo corta den presupuesto na 2023 pa por cumpli cu CAFt. Ainda e pregunta ta kico Gobierno di Aruba ta bay haci pa e peso no cay riba comercio y pueblo di Aruba. Gobierno lo bin cu por ehempel un plan di inversion of incentiva pa stimula y crece nos economia y asina tambe crece nan entrada? Of e plan ta manera den pasado pa djis hisa impuesto cu lo afecta comercio y saco di tur ciudadano? Ta preguntanan cu nos tur tin cu puntra nos mes y nos mandatarionan.
