BonaireFeatured

Kurso di kòmpiuter ‘Klek i Taip: e base’ a ranka sali un biaha mas

Computercursus ‘Klik En Tik De Basis Opnieuw Van Start

E kurso di kòmpiuter ‘Klek i Taip: e base’ a ranka sali atrobe ku e di dos grupo di kursista. Dia 21 di novèmber 2022 e kurso akí a kuminsá bou di guia di Biblioteka Públiko Boneiru. Ta trata di un kurso kaminda ta sera konosí ku kòmpiuter. Partisipantenan na e kurso ta interesadonan ku a tuma kontakto ku Biblioteka Públiko. Studiantenan di ICT di MBO ta duna e kurso di kòmpiuter akí i el a keda organisá den kolaborashon ku departamento di ICT i e grupo di trabou Digitalisashon di Entidat Públiko Boneiru. Den luna di yanüari 2023 nan ta bai kuminsá ku un di tres kurso básiko tambe.

Durante e kurso di kòmpiuter nan ta trein vários abilidat básiko di kòmpiuter.  E ora ei nan ta trata preguntanan manera ‘Kon mi ta sende un kòmpiuter? Kon mi por taip? Kon mi ta manda un meil?’. En total e kurso ta konsistí di un sierto kantidat di enkuentro. Di e manera akí e partisipantenan na e kurso ta hasi pasonan chikitu, kaminda nan ta sera konosí mas aleu ku kòmpiuter. Por pensa akí riba sende kòmpiuter, siña taip i traha ku e ‘muis’. Nan ta trein tambe ku trahamentu di un sita riba www.bonairegov.com. Partisipantenan mas avansá ta trein tambe ku mandamentu di meil i hasi uso seif di internèt.

For di aña pasá Entidat Públiko Boneiru ta traha riba digitalisashon di su trabounan. Un di e sinku tareanan di Biblioteka Públiko Boneiru ta pa den e trayekto akí ofresé desaroyo i edukashon. E kurso di kòmpiuter Klek i Taip ta kai bou di esaki. E otro tareanan ta: ofresé konosementu i informashon, stimulá lesamentu, organisá enkuentro i debate i laga sera konosí ku literatura, arte i kultura.

Digitalisashon tin influensia riba funshonamentu diario di tur hende i desaroyonan ta bai hopi lihé. Biblioteka Públiko Boneiru ta tene kuenta ku esaki pa medio di duna informashon i ofrese treinen na komunidat. Bo tambe ke siña e pasonan básiko akí? E ora ei bo ta bon biní pa for di awor inskribí pa e kurso grátis akí. Pa mas informashon tokante e posibilidatnan bo por tuma kontakto ku Biblioteka Públiko Boneiru na number di telefòn 715 – 5344 òf pasa personalmente na Kaya Gramèl s/n.  

Related posts

Lisette Malmberg, e prome lider femenino di PPA y #1 riba lista

EA News Author

Te cu 29 di december por registra cambio di 2023: KvK ta urgi tur empresario pa actualisa e datos di e negoshi

EA News Author

Inskripshon pa Estudio Básiko pa bira Agente di Wardakosta ta habr

EA News Author

Leave a Comment

Whatsapp Message