Ku disgustu Miembro di Parlamento pa frakshon di MFK, David Seferina a tuma nota kon e lider di partido PAR ta sigui kometé fayo tras di fayo, ku e simpel meta pa trose bèrdat i tira santu den wowo di pueblo.
Den e trayektoria di apénas 1 aña i mei den Parlamento, lider di PAR na vários okashon a bin ta trose bèrdat. E lider di PAR, alabes èks minister di hustisia a baha bai, sin nunka a trese klaridat den e kaso di 600 kilo ku a disparsé for di warda di polis na Rio Canario. E aña aki a bin Sali na kla ku banda di “kaso 600kg” tambe a keda sin kumpli ku mandato di e RvM di e tempu ei esta aloká e fondo nan nesesario pa pago di e suma èkstra ku e mes a regla pa pais paga pa wardakosta refiriendo aki na e suma di 3.84 mion euro.
Siendo miembro di Parlamento, e lider di PAR a tilda e aktual minister di salubridat di kier a regalá Abdala, Jourdain i tambe Yarzagaray algun mion florin, siendo ku anteriormente e mes tabata den direktiva di e fundashon, ku a haña e enkargo pa disolvé e fundashon, lokual no a sosodé te ku awor aki siendo e la nombra su mes komo verreffenaar.
Durante un programa na radio, e lider di PAR a hañ’é ta rektifiká despues di a lansa mentira i tilda e èks doño di Campo Alegre, sr. John Loth di a keda sentensiá pa trafikamentu di hende lokual no tabata e bèrdat.
Durante reunion públiko pa trata desaroyonan rondó di refineria, e lider di PAR a divulgá informashonnan konfidensial ku ta forma parti di un Non-Desclosure agreement (NDA). Minister presidènt a risibí un yamada den parlamento i a haña konfirmashon ku lokual ku Lider di PAR a divulgá ta for di e dokumento konfidensial saka for di NDA
Por mira klaramente ku e lider di PAR, di forma struktural ta kometé fayo, ku e solo intenshon pa kita tur bista for di e fayonan garafal kometé dor di su persona. P’esei pueblo di Kòrsou mester keda atento riba e fayonan kometé pa e lider di PAR i su frakshon pa nan no sigui manipulá i trose e bèrdat pa komunidat.