Lieve mooie Juffrouw Astrid di e exitoso scol di baile “Simadanza” ( cu ta existi y activo cu
varios tremendo maestra den baile dunando les desde anja 1975 ) mes no ta dunando les di baile
mas, cu su edad respeta, pero ta bailando ketobay y fuertemente cu hopi gradicimento na su
curason, su mesun dushi ritmonan den bida cu su bon salud, alegria y hopi sabiduria. Un
“Beauty Dance Queen inside out”. Oh con dushi y agradabel tawata nos combersacion,
disfrutando un dushi koppie thee y koffie, come un par di dushi “pastechi-empana-style”
recientemente na Las Cappuccinas, durante un mainta cu a dura te den oranan di merdia. Astrid a
keda hopi contento cu e poema “ Tesoronan den baile” dedica na su persona, inspira y skirbi pa
Lady Ruth. Astrid a demonstra esaki for di su bunita y humilde curason, y tambe cu un boeket di
flor masha bunita mes. Ruthy Vrieswijk-Bergen “Lady Ruth” a recita e poema e bunita anochi di
Dia Internacional di baile den Cas di Cultura dia 29 di April 2024 ultimo, e sala completamente
yen, organisa pa departamento di cultura su team dinamico encabesa pa e talentoso Jhon Freddy
Tobon Montoya.
Astrid Salazar ta “E Artista Tesoro den baile” unico y inigualabel cu a inspira y sinya hopi
alumno expresa nan mes mas den nan baile folklore of moderno , e.o. Lady Ruth su ruman
homber mayor Roy Bergen, Edmund Tujeehut, Cai Profet, Osrick Toppenberg y e cabayero
Winklaar y mas, tempo cu e cabayeronan aki tawata mas hoben, talentoso y cu curashi, pasobra
mayoria bes ta hobennan femenino ta tuma les di baile awendia. E alumnonan di Simadanza a
sinya e pasonan di mas dushi, di mas bunita, di mas elegante y di mas impactante. Ata aki e
poema pa Tesoro Astrid Salazar. Aruba su prenda humano profeshonal balioso. Un prenda
precioso y unico.
E TESORONAN DEN BAILE
E costuumnan bisti ta impacta
Dushi Musica ta resona
E stage “pista” di baile ya ta anhela y anticipa
E pianan y cinturanan pa yanga y deshoga riba dje
Pa sacudi suave y firme, firme y suave expresa
Den Movecionnan di pia te cabes
Mi palabranan poetico den carni
Cu ta ponemi lubida,
Traha lugar pa sintimentonan adora
Crea e baile di bida den mi poema
Crea e perfume den mi sonrisa ilumina
Pa e bunita dinamico Maestra Profesora Astrid Salazar aprecia y stima
Pa hopi anja jufr. Astrid a yanga move sapatea manera un pluma blanco cu alegria
Awe ta su dia, Awe nos ta reconose, Awe nos ta bisele Danki, Si, Awe ta su Dia
Awe e ta stima’su mes y su mesun baile di bida mas
Awe mas cu nunca den su mes
Con dushi y bunita tur su pasonan un dos tres
No tin edad den su bunita curpa cu ta limit’e
No tin cuchuw den su lomba pa strob’e
No tin ningun hende cu por taha e ni ami
Nos libertad den expresion infinito
Su alma cu tur amor na su Creador Divino
Cu a duna’e bon oido pa scucha e ritmo su pasion
Sigui den su pasonan di creatividad y inspiracion
Ta Dios di Universo ta su bendicion
Mi mannan den tur libertad na laira
Awe niun hende por stop ami tampoco di baila
Ni den mi mente, ni den mi alma y ni den mi curason
Den mi curpa, excita cu cada melodia, cada cancion
E musica ta invita’mi, yama’mi, caricia’mi
E musica y ami ta UN
E Maestra Profesora Astrid y su baile unico ta manera un strea precioso
E Maestra Profesora Astrid a inspira tur cu a hanja les for di dje
Astrid Salazar, Maestra Profesora Inigualabel di bailenan di antes te awor
Danki lieve juffrouw Astrid, pa a comparti di bo donnan y talentonan cu amor !
Cu Creador di Universo drama su bendicion ariba bo, awe y semper.
Sigui disfruta di bo dushi bida colma di salud, “One day at a time”
Astrid Salazar, YOU are the blessings !!! YOU SHINE !!!!
Ruthy”Lady Ruth” Vrieswijk-Bergen
(29 April 2024 , Aruba)
Danki pa lesa nos relato cu amor y atencion y danki pa tur e bon comentarionan ricibi
regularmente. Pasa un dushi dia colma di salud, alegria, sabiduria y bendicion. Un “bearhug” pa
boso tur di Ruthy”Lady Ruth” Vrieswijk-Bergen.
