Desaroyonan mundial, cu ta encera aumento drastico di costo di bida, ta exigi pa
gobierno soru pa tur hende sobra mas cen den nan saco. MAN-PIN ta di opinion cu
mester baha Loon- y Inkomstenbelasting (LB/IB).
Mientras mester aumenta AOV mas lihe posibel pa nos grandinan.
Tambe ta importante pa reintroduci deduccion di gasto pa mantencion di cas y tambe
baha impuesto riba biennan inmobil manera cas y tereno (OZB).
MAN-PIN den su programa di vision y maneho pa ultimo eleccion, a trece bon cla
dilanti cu mester baha costo di bida, simplifica e sistema di impuesto y baha e peso di
impuesto fo’i riba lomba di e clase trahado y principalmente di clase media. Ademas
MAN-PIN, despues di a tuma nota di e guera economico mundial di tarifa cu presidente
di Merca, Donald Trump a inicia, a alerta cu Corsou como parti di mundo y na mes
momento un pais cu ta importa mas cu 90 porshento di su productonan, mester
cuminsa tuma accion pa combati e subida general di prijs, esta inflacion, cu e guera
di tarifa mundial ta ocasiona.
Mientrastanto CBSC a duna di conoce cu e situacion aki lo tin un impacto riba nos
economia dor di e subida di prijs (inflacion) cu lo afecta forsa di cumpra. P’esei pa
MAN-PIN, awor mas cu nunca, mester cue e toro tene na su cacho. Ta basta papia;
mester tuma accion mesora. MAN-PIN ta propone como un alternativa pa baha e
porsentahenan aplicabel aworaki di LB/IB di e siguiente manera. Subi e asina yama
“belastingvrije voet“ di Cg 30 mil pa Cg 38 mil mientras cu ta reduci e porcentahe di
“schijven”nan di LB/IB entre 5 porshento te ku 10 porshento.
Un ehempel: Bo entrada pa aña ta entre Cg 38,225 pa Cg 50.968. A base di “schijf” 2 di
LB/IB bo ta paga 15 porshento na impuesto. Cu e proposicion di MAN-PIN lo bo paga 10
porshento na lugá di 15 porshento na impuesto riba bo salario/entrada, locual cu ta
nifica cu alrededor di Cg1800 pa aña, esta Cg 150 tur luna mas den bo saco.
E reduccion aki tin efecto grandi riba entrada di impuesto directo (por ehempel riba
salario) pa caha di Gobierno, pero na mes momento ta genera mas entrada indirecto
(por ehempel riba producto cu ta cumpra) pa caha di Gobierno. Esaki ta compensa por
parti e perdida di impuesto directo.
Tin mas opcion ku por keda introduci pa reforma nos sistema di impuesto. Por
simplifica e sistema dor di elimina e 6 diferente “schijf” actual di LB/IB y introduci por
ehempel solamente 3 “schijf”. Un ehempel di un sistema di impuesto directo cu ta
consisti di 3 Cg di “schijf”:
0 – 60.000 10%
60.000- 120.000 20%
120.000 – pariba 35%
E aspecto solidario mester keda di forma cu esunnan cu schouder mas hancho, ta contribui
mas na pago di impuesto. Importante ta cu e trahado mester keda cu mas cen den su
saco y asina e forsa di compra di e trahado ta subi.
Mas aleu MAN-PIN ta recomenda pa reintroduci deduccion di gasto di mantencion di
vivienda propio te na un montante di Cg 5.000 pa aña for di entrada anual (IB). Esaki ta
contribui na desaroyo economico caminda hende ta haña trabou den area di
construccion y na mes momento balor di cas propio por keda mantene.
Finalmente, MAN-PIN ta kere firme cu hunto cu ley e reduccion di impuesto riba cas y
tereno (OZB), cu fraccion di MAN-PIN a introduci, lo sigui desaroya nos economia pa
tur hende sobra mas cen den nan saco y pa bo por tin un bida digno.
Asina’ki nos ta promove husticia fiscal transparente pa un y tur cu ta aporta na nos
economia.
Mientras ta mustra e urgencia pa aumenta AOV di nos grandinan pa nan por tin un bida
mas digno. Asnia’ki nos ta promove husticia fiscal.